අ හෝ නීතිය…. A Whore Law….

එක් භාෂාවකින් ශබ්ධ වන වදන් සමූහයක් බොහෝ විට වෙනත් භාෂාවකට පෙරැලෙන විට එහි මුඛ්‍යාර්ථය බොහෝ විට වෙනස් වුවත්, කියැවෙන දේ එකිනෙකට  ගැලපෙන්නේ කලාතුරකිනි. ලංකාවේ පසුගිය සති කිහිපය තුළ සිදු වූ සිදුවීම් සළකා බැලීමේදී ඉහත වගන්තිය අර්ථයෙන් වෙනස් වුවත් කෙතරම් ගැලපේදැයි ඔබටම සිතා ගන්නට භාර කරමි.

නීතිය සරළ නොවේ… එසේම නීතිය අපූරුය… සෑම නීති වගන්තියකම කොහෝ හෝ සිදුරක් ඇත… නීතීඥයින් ජීවත් වන්නේ ඒ සිදුරු තුළින් සිය සේවා දායකයා රිංගවා යැවීමෙන් සහ ඒ නීති තුළින් රිංගන්නට ඉඩ ළබා නොදීම තුළිනි. ඒ විත්තිය සහ පැමිණිල්ල නියෝජනය කිරීමෙනි. නීතිය අපූරු වන්නේ ඒ නිසාය. නීතිය සැමට පොදුය… නීති පොතේ ඇත්තේ එසේය… ශීලාචාර සමාජයක් නීතිගරුකය. නීතිය වල් වැදුන තැන සමාජය වල් වැදේ… බලවතාට එක නීතියකුත්, දුබලයාට තවත් නීතියකුත් එකම රටේ බලපැවැත්වේ – නමුත් නීති ප්‍රකාරව නොවේ. නීතිය සමබර බවත්, පුද්ගල තරාතිරම නොබලා සැමට එකසේ දඬුවම් ලබා දෙන බවත් පෙන්නුම් කිරීමට නීතියේ යුවතියගේ දෑස් බැඳ, තරාදියක් සහ අසිපතක් මගින් නිරූපණය කෙරේ… සංකේතාත්මකව එසේය..

නීතිය වල් වැදුන තැන ජනතාව නීතිය අතට ගනිති. නීතිය ක්‍රියාත්මක කරන්නවුන් නිසි ලෙස නීතිය ක්‍රියාත්මක කිරීමට බැඳී සිටිති. නීතියේ හැටියට අපක්‍ෂපාතී විය යුතු වුවත්, මුදල් මිටියකට හෝ මූල්‍යමය හෝ ශාරීරික අල්ලසකට, හෝ බලවතෙකුගේ අණට නීතිය පක්‍ෂපාතී වීම බොහෝ දුරට අසන්නට දකින්නට ලැබේ. වරෙන්තු මැද වුවත් සුධර්මන් රදලියගොඩ පොලීසියේ මහත්වරු සමඟ පොටෝ ගන්නේත්, අවිවිශිබමයේ කැඳවුම්කරු පැමිණිල්ලක් සිදුකර දිනක් යන්නට මත්තෙන් අත්අඩංගුවට පත් වන්නේත් මේ නිසාය.  මේ නිසාම සාමාන්‍ය ජනතාව නීතියේ පිළිසරණ පැතීමෙන් ඈත් වේ… එය නොවිය යුත්තක් වුවත්, ජනතාවට නීතිය පිළිබඳ විශ්වාසයක් නොමැති වූ විට, ඔවුන් නීතියෙන් ඈතට ගමන් කරති. වනචාරී බවේ ආරම්භය නීතිය පිළිබඳ විශ්වාසයක් නොමැති වීමයි.

නීතිය ක්‍රියාත්මක කරන්නවුන් නීතිය තමන්ට කැමති පරිදි හැසිරවීම නීතියේ යුවතිය ගණිකාවක් බවට පත් කර ගැනීමයි. නීතියට සිදු වී ඇති මේ සංගදිය දැක කෙනෙක් අහෝ නීතිය යැයි කියන විට.. නීතිය ගණිකා වෘත්තියේ යෙදවෙන කල්හි, ඉංගිරිසියට බර වූ තවෙකෙක් A Whore Law යැයි නොකියයි ද ?

කුමට එරට අධිකරණය නීතිය සහ විනිසුරන්… ?

It’s rare to see a set of words in one language gives a certain meaningful idea in another. Considering what happened in the political arena in Sri Lanka during last few weeks, isn’t it appropriate to title this post as above ?

Law is complicated. Pretty much every rule has a loophole. Those who are skilled, go through them. Those who know the law, help them to go through by defending, or prosecuting otherwise. Ironically, the very lawyers who defend and prosecute, represent either side: funny and interesting.

Law, Definition : Law is a system of rules and guidelines which are enforced through social institutions to govern behavior. Laws are made by governments, specifically by their legislatures. The formation of laws themselves may be influenced by a constitution (written or unwritten) and the rights encoded therein. The law shapes politics, economics and society in countless ways and serves as a social mediator of relations between people. (Ref. Wikipedia)

A civilized society is built upon proper law and order, or the system collapses otherwise. Law is common for everyone despite of their position or power or wealth, and it should be. However, this is not the common case in Sri Lanka. As we all know a lot of powerful personalities can bend the law as they wish. This is why Sudharman Radaliyagoda mingles among police officers in public despite issued warrants and the convener of IUSF is arrested within 24 hours on a complain.  That’s the law we experience in Sri Lanka : Unfortunate, for common man, but good for the rich and powerful.

Once the common man lose the trust, they take law into their hands. Once the trust is lost, the system collapses,. Then they make the Lady justice a whore,… A whore Law, අ හෝ නීතිය….

No more to add,.. We all know what’s going on.

ඇල්කෙමියාගේ රසායනාගාරය හයිඩ්‍රජන් සංවත්සරය සමරයි… කියවූ සහ ප්‍රතිචාර දැක්වූ හැමෝටම ප්‍රණාමය…..

 

හයිඩ්‍රජන් සංවත්සරය

ගිය අවුරුද්දේ අප්‍රේල් 13 වෙනිදා ඇල්කෙමියටත් කරන්න දෙයක් නැතිකමට බ්ලොග් එකක් පටන් ගත්තා… නමක් හොයන්න අමාරු වුනේ නැත්තේ ඇල්කෙමියා ඉස්සර ඉඳලම “ඇල්කෙමියා“ කියන නම බොහෝ දේට භාවිතා කරමින් තිබුණ නිසා.. ඉතින් මුලින් මුලින් රසායන විද්‍යාව සම්බන්ධ දේ පමණක් ලියන්න හිතාගෙන හිටියත්, සමහර වෙලාවට අරමුණෙන් අපගමනය වුනේ පුංචි පුංචි දේශපාලන කතා ලියැවිච්චි නිසා.

වසරක් ගතවෙද්දි ඇල්කෙමියගේ රසායනාගාරයට ගොඩ වැදිච්ච ගණන 11000 ක්. ලිපි නම් ලියැවුනේ පනස් අටයි. ජුලි මාසේ ඉඳලා ඇත්තම රසායනාගාරයේ වැඩ පටන් ගත්ත නිසා ලිපි සංඛ්‍යාව පොඩ්ඩක් අඩු වුනා. ජනවාරි මාසයේ ඉඳන් ඇල්කෙමියාගේ දිනපොත පටන් ගත්ත නිසා නිතිපතා ඇල්කෙමියාගේ රසායනාගාරයට ලියන්නට බැරි වුනා. ඒ වුනත් ඉඳලා හිටලා කවුරු හරි මතක් කළාම ඔන්න ලිපියක් ලියන්න ගන්නවා.

මේ අතරේ තමයි ඇල්කෙමියා පාඨක ප්‍රතිචාර අහලා ලිපියක් ඉදිරිපත් කලේ. ඒ අනුව සමහර අයගේ ඉල්ලීම වුනේ නැනෝ තාක්‍ෂණය ගැන ලිපියක් පළ කරන්න කියලා… දන්න හැටියට ලියලා දාපු ඒ ලිපියට ලැබුන ප්‍රතිචාර අනුව නැනෝ යන්ත්‍ර ගැනත් ලියැවුනා.. මේ වගේ ලිපි තවදුරටත් ඉදිරියට ඉඩ ලැබෙන විදියට ලියැවේවි.. නිතරම බලන්නේ කාට හරි දැනුමක් එකතු කරගන්න පුළුවන් යමක් ලියන්නයි.

දිනපොතත්, රසායනාගාරයත් යන දෙකම ලියැවෙන නිසාත්, ඇල්කෙමියාගේ ඇත්තම රසායනාගාරයේ වැඩ අධික බව නිසාත් සතිපතා නම් ලිපි ලියැවෙන එකක් නැහැ. නමුත් ඇල්කෙමිච්චිවත් ශේප් එකේ තියාගෙන උදේට උදේට ඇහැ ඇරිලා සතියක් විතර ලියන ලිපියක් ඉඳහිට පළ කරන්නම්. මේ ලිපි ලියන නිසාම මගේ අමතර දැනුමත් ටිකක් වැඩි වුනා කිව්වොත් නිවැරදියි….

ඉතින් පාට පාට පාඨක ඔබ සැම මේ ඇල්කෙමියාගෙ රසායනාගාරයට ගොඩ වැදිලා යම් දැනුමක් ලබා ගන්නවා නම් ඒක ඇල්කෙමියට සතුටක්. ඇල්කෙමියා මේ රසායනාගාරයේ ලිපි පළ කරන්නේ පොරක් වෙන්න හිතාගෙන නෙවෙයි. ඇල්කෙමියට කවදාවත් පොරක් වෙන්න ඕනෙත් නෑ… හැබැයි කවුරු හරි ඇල්කෙමියා පොරක් කියලා කියනවා නම් ඒ ගැන තර්ක කරන්න යන්නෙත් නෑ…. අනිත් හැමෝටම වගේ ඇල්කෙමියටත් තියෙනවා දේශපාලන දර්ශනයක්. ඒක ආණ්ඩුවට පක්‍ෂද විපක්‍ෂද කියලා නෑ.. ඇල්කෙමියාට හරියි කියලා හිතෙන දේට හරියි කියනවා. එල්ටීටී එක වුනත් හරි දෙයක් කරනවා නම් ඒක හරි කියලා කියන්න ඇල්කෙමියා පසුබට වෙන්නෙත් නෑ… ආණ්ඩුව කරන හරි දේ අගය කරන්න වගේම වැරදි දේ විවේචනය කරන්නත් ඇල්කෙමියාට කොන්දක් තියෙනවා. සමහරු ඇල්කෙමියාගේ රසායනාගාරය දේශපාලන බ්ලොගයක් කියලා වරදවා වටහාගෙන තිබෙනවා ලු. ඒත් ලංකාවේ සිදුවන දේ ගැන විවේචනය කිරීමේදී සමහරුන්ට මේ බ්ලොගය දේශපාලනිකව පෙනෙනවා ඇති. නමුත් මේ සටහන්වල අරමුණ වන්නේ දැනුම බෙදාහැරීම පමණමයි…

 

ඇල්කෙමියාගේ දැනුම center එක

ඉතින් සුපුරුදු පරිදි පුළු පුළුවන් වෙලාවට ඇල්කෙමියා මේ රසායනාගාරයට ගොඩ වැදිලා අළුත් යමක් ඔබට දේවි… ඇල්කෙමියා මේ රසායනාගාරය කරන්නේ හිට් ගණන බලාගෙනත් නෙවෙයි…. හැබැයි කවදාවත් මේක ඇල්කෙමිච්චි නං හැක් කරන්නේ නෑ කියන එකත් ඔය සමහර ඇත්තන්ට මතක් කරලා දෙන්න ඕන…..

එහෙනම් ඔබ සැමට සුබ අළුත් අවුරුද්දක් වේවා… වැඩි වැඩියෙන් කියවන්න ලියන්න ලැබේවා…. !

අපි ඇත්තටම නිදහස් රටක් ද ?

මම මේ ලිපිය ලියනවිට ශ්‍රී ලංකාවේ 63 වන නිදහස් උළෙල කතරගම නගරයේදී අභිමානයෙන් පැවැත්වෙනවා ඇති… ඒත් රටේ වන සිද්ධි දිහා බැළුවම ඇත්තටම ශ්‍රී ලාංකිකයා නිදහස් ද කියලා මට නම් දෙපාරක් තුන්පාරක් නෙවෙයි දහපාරක් වත් සිතන්න වෙනවා.

අද ශ්‍රී ලංකාව නම් දැනට වසර එකහමාරකට තිබුණාට වඩා සාමකාමියි, නිදහස්. ඒ රටේ සාමාන්‍ය ජනතාවගේ දෛනික ජීවිතය දිහා බැළුවාම…. උදේ ගෙදරින් වැඩට යන මනුස්සයා බෝම්බෙකින් මැරෙන්නේ නැතුව ආයේ ගෙදර ඒවි කියලා ගෙදර ඉන්න අයගේ හිත් සැනසීමෙන් ඉන්න පුළුවන් තත්ත්‍වයට රට නිදහස්….

නමුත්, ඇත්තටම අපි නිදහස් ද ? අපි සිතිවිලි වලින් නිදහස් ද ? ආර්ථික වශයෙන් ? දේශපාලනික වශයෙන් ? ආකල්පමය නිදහසක් ? තමන් කැමති කර්මාන්තයක් කප්පං නොදී කරගෙන යාමට නිදහසක් ? අල්ලස් නොදී  වැඩක් කරවාගැනීමේ නිදහසක් අපට තියෙනවා ද ? කතා කිරීමට, රිසි ලෙස ලිවීමට, නිදහසක් තියෙනවාද ? ඉස්සරට වඩා දැන් නිදහස තියෙනවා නේද කියලා යමෙක් ප්‍රශ්න කරන්න පුළුවන්. ඔව් 88-89 කාලෙට වඩා නම් දැන් දහගුණයක් හොඳයි.

දේශපාලනික නිදහස.

දේශපාලනිකව නම් මම පෞද්ගලිකව සිතන විදියට ටිකක් නිදහස අඩුයි. ආණ්ඩු පක්‍ෂයට ආවඩනවා නම් නිදහස උපරිමයි. නමුත් විපක්‍ෂයේ නම් නිදහස සීමිතයි.  මර්වින් සිල්වාට ආයුධ අරගෙන රටේ ඕනෑම තැනක යන්න පුළුවන්, නමුත් අන්තරේ කැඳ හදන තරුණයා ආයුධ ඇතැයි සැකපිට අත්අඩංගුවට අරගෙන ආයුධ හොයාගෙන නැතුවත් තවම පරීක්‍ෂණ කරනවා. රටේ මැති ඇමති වරු වැහි වැහැලා, නමුත් රටේ ජීවන වියදම අහස උසට. ඇමතිවරුන්ට කෝටි ගණන් මුදල් වෙන් කෙරෙත්දී ගංවතුරෙන් අනාථ අයට වෙන් කෙරෙන්නේ සොච්චමයි.  මේ ගැන ලංකාවේ ඉන්න අය මට වඩා හොඳට දන්නවා.

අධ්‍යාපනය.

අධ්‍යාපනය නම් තවමත් නිදහස්, නමුත් දරුවන්ට නිදහසේ අධ්‍යාපනය කරගෙන යන්න පුළුවන් ද?  බොහොමයක් අධ්‍යාපන ලොක්කෝ අධ්‍යාපනය ගැන මෙලෝ හසරක් නොදන්න දේශපාලන හෙංචයියෝ. කරන තරමක් කරන්නේ මැටි වැඩ. සාමාන්‍ය පෙළ 51% ක් ගණිතය අසමත් කියලා ප්‍රශ්න පත්‍ර පහසු කරන්න යන ජාතියේ අධ්‍යාපනඥයෝ ඉන්න රටක් මේක.  බොහොමයක් විෂය මාලා තවමත් පැරණි තත්ත්‍වයේ පවතින්නේ. අළුතෙන් දැනුමක් එකතු වෙන්නේම නැති තරම්. ඒ වගේමයි ගුරුවරුන්ගේ දැනුම ඇගයීමකට ලක් නොවෙන නිසා ගුරුවරුන් පරණ පුරුදු විදියටම උගන්වාගෙන යනවා. අළුත් අළුත් ඉගැන්වීම් ක්‍රම කෙරෙහි අවධානයක් යොමු වන්නේ නැහැ.

ආකල්පමය නිදහස.

ආකල්පමය වශයෙන් නම් අපූරුව නිදහසක් අපි භුක්ති විඳිනවා. පිටරටින් එන හැම කුණුගොඩම අපේ ආකල්පවලට එක් කරගන්න තරම් තරුණ පරපුර නිදහස්. ගිණි මද්දහනේ උණුසුම් කබා දාගෙන සින්දු කියන්න තරම් අපේ තරුණ ගායකයෝ නිදහස්. පවුල් අවුල්, හොරකම්, මැරකම්, වංචා දූෂණ සියල්ලන්ටම හෝයි ගාලා පෙන්නන්න තරම් අපේ විරූපවාහිනී නාලිකා නිදහස්. ඉගෙනගන්නවාට වඩා සුපර් ස්ටාර් කෙනෙක් වෙන එක ලේසියි කියලා කුඩා ළමයින්ට පවා ඇඟට දනවන්න තරම් රූපවාහිනී නාලිකා නිදහස්. ලියන්න කියන්න නම් තවමත් තරමක් නිදහසක් තියෙනවා. කවුරු කළාද කියලා නොදන්න නමුත් සමහර විකල්ප මාධ්‍යවලට ටිකක් නිදහස අඩුයි… සමහර විට ඔවුන්ම කරගන්නවාද දන්නෙත් නෑ… ලංකාවෙ කට්ටිය නේ.. නීතිය ගැන නම් කියන්න දෙයක් නෑනේ.. අත් අඩංගුවට ගන්න හොරා මාංචු දාලා ආයුද පෙන්නන්න ගෙනගියාම පොලීසියේ 10 කට විතර වෙඩි තියන්න ගිහින් ඔලුවටම වෙඩි වැදිලා මිය යනවා. දකුණු කකුලේ තුවාලයකට බෙහෙත් දාන්න රෝහලට ගියාම වම් කකුල නැතුව ගෙදර එන්න වෙන රෝගීන් ඉන්නවා. ඒ වුනාට දොස්තරලා නිදහසේ ඉන්නවා. රටේ බාලවයස්කාර දැරියන් 30,000 ක් මවුවරු වෙන්න තරම් ලිංගික නිදහසක් අපට තියෙනවා. නමුත් පෝස්ටරයක ගෑණියෙක්ගේ කකුලක් නිරාවරණය වෙලා තිබුණොත් විලිසංගේ නැති වෙනවා කියලා මොර දෙන්නත් නිදහස තියෙනවා..

අල්ලස දූෂණය නැතිව හරියට වැඩකරගෙන අවංකව රට දියුණු කරන්න උවමනාවකින් වැඩ කරන දේශපාලනඥයෝ 20 ක් ඉන්නවා නම් මේ රට හරි තැනකට ගන්න මහ කාළයක් වැය වෙන්නේ නැහැ. මේ අය කොච්චර හිටියත්, ඒ අයට නිදහසේ රට දියුණු කරන්න නිදහසක් ඇත්තෙත් නැහැ.මෙන්න මෙහෙමයි අපේ රටේ නිදහස මම දකින්නේ.

අර සුනිල් පෙරේරා කියනවා වගේ

“නිදහස නොදී අපට, සුද්දා හිටියා නම්, ලංකාවට මෙහෙම වෙන්නෙ නෑ“

මේ වෙන සින්දුවක්…..

මේ මොන ප්‍රශ්න තිබුනත්, මටනම් ලංකාව තරම් වටිනා රටක් කොහේවත් නෑ……..සැබෑ නිදහසක් එන දවසක අපිත් නිදහසේ කතාකරමු…..

ලංකාවේ බුද්ධිගලනය (Brain Drain) නැවැත්විය හැකිද ?

මේ ලිපියට පාදක වන්නේ ලංකාවේ බුද්ධිගලනය පිළිබඳ වූ මේ වාර්තාවයි.

ලංකාවේ බුද්ධිගලනය අද ඊයේ ඇති වූ ක්‍රියාදාමයක් නොවේ. 60 දශකයේ පමණ සිටම ලංකාවේ විසූ උගත් පිරිසෙන් සැළකිය යුතු ප්‍රමාණයක් සෑම වසරකම විදේශයන්හි රැකියා හෝ පදිංචිය කරා පිටත් වූවා. මෙය පවතින ආණ්ඩුවේ හෝ ශ්‍රී ලාංකික සමාජයේ වරදක් ද ? එසේත් නැතිනම් එසේ විදේශගත වන්නන්ගේ රටේ වරදක්ද යන්න විග්‍රහ කරනවාට වඩා එසේ බුද්ධි ගලනය සිදුවන්නේ ඇයි ද යන්නට හේතු සෙවීමක් වශයෙන් මෙම ලිපිය දැක්විය හැකියි.

බොහෝ දෙනා පිටරටට ඇදීයන හේතු බොහොමයකි.

• හොඳ රැකියාවක් සොයාගැනීම

• උගත්කමට සරිලන රැකියාවක් ලංකාවේ නැති නිසා

• පවතින සමාජයීය තත්ත්‍වය පිළිබඳ කළකිරීම නිසා

• අනෙක් අයට වඩා හොඳින් ජීවත් වීමට හෝ එසේ පෙන්වීමට

• රට රැකියාවක් කරන නිසා වැඩි පිළිගැනීමක් ඇතිවෙනවා යැයි සිතන නිසා

• ජීවිතය රැකගැනීමට

• වැඩිදුර අධ්‍යාපනය ලබා ගැනීමට ගොස් එහිම නතර වීම නිසා

• සුළු කලක් රැකියාවට ගොස් වෙනත් රැකියා අවස්ථා ලැබීම නිසා නතර වීම

• පිටරට වැටුප් ලංකාවේ රුපියල් වලට පරිවර්තනය කිරීමේ දී වැඩි අගයක් ලැබෙන නිසා.

වැනි මෙකී නොකී හේතු කාරණා නිසා බොහෝ දෙනෙකු පිටරට ජීවත් වීමට ලංකාවෙන් පිටතට ඇදී යති. මෙසේ පිටත්ව යන සෑම දෙනාම පාහේ කියන්නේ පිටරටවල වරුණයි. සුළු කාළයකට හෝ පිටරටකට යන පුද්ගලයා ඒ ඒ රටවල විධික්‍රම වලට ක්‍ෂණයෙන් අනුගත වන නමුත්, නැවත ලංකාවට පැමිණි පසු, නැවත පරණ පුරුද්දෙන්ම ක්‍රියා කරගෙන යයි.

දැනට ලංකාවෙන් උපාධියක් ලැබ පශ්චාත් උපාධි හැදෑරීම සඳහා විදේශගත වන සිසුන්ගෙන් 95% ක් පමණම ඒ ඒ රටවල නතර වීම ලංකාවේ බුද්ධිගලනය දැඩිව සිදුවන අංශයකි. එසේම පසුගිය කාළයේදී විශ්ව විද්‍යාලවල දේශකවරුන් පශ්චාත් උපාධි පාඨමාලා හැදෑරීම සඳහා විදේශගත වී එහිම පදිංචි වීම ද බුද්ධි ගලනයේ බැරෑරුම් අවස්ථාවකි. මොවුන් සඳහා රජය වියදම් කර, යම්කිසි බැඳුම්කරයකට යටත්ව විදේශගත වන අතර, ඔවුන් නොපැමිණිම රටට බලවත් පාඩුවකි.

එසේ බැඳුම්කරවලට යටත්ව විදේශගත වී නැවතුනු පුද්ගලයනට සමාවක් දී නැවත මවු රටට පැමිණෙන ලෙස උසස් අධ්‍යාපන ඇමති තුමා සහ ජනාධිපතිතුමා ඉල්ලීමක් කර තිබෙනු පුවත්පතක සඳහන් වී තිබුණා මතකය… ඔවුන් නැවත පැමිණෙයිද ? ඔවුන් නැවත ගෙන්වාගෙන රටට සේවයක් ගැනීමට නම් රජය විසින් ඉටු කළ යුතු කරුණු රාශියකි.

පළමුව ඔවුන්ගේ දැනුමට සරිලන රැකියා ස්ථාපිත කල යුතුය. පසුගිය වසරේ මාත් මගේ මිතුරන් කිහිප දෙනෙකුත් ලංකාවට නැවත පැමිණීමට සිතා විවිධ රැකියා කෙරෙහි අවධානය යොමු කළෙමු. අප සැවොම රසායන විද්‍යා ආචාර්ය උපාධි ලබා ඇත්තවුන් වන අතර කිසිදු කර්මාන්ත ශාලාවක හෝ සමාගමක එවැනි අධ්‍යාපන සුදුසුකමකට සරිලන රැකියාවක් නොවීය. තිබූ එකම තැන වන්නේ ශ්‍රී ලංකා නැනෝ තාක්‍ෂණ ආයතනයයි (SLINTEC) එහිද වූ රැකියා නැනෝ තාක්‍ෂණය සම්බන්ධයෙන් දැනීමක් ඇත්තන් හට වන අතර බොහොමයක් රැකියා ව්‍යාපෘති මූලික කරගෙන ඇති කළ ඒවා විය.. ව්‍යපෘතිය අවසන් වීමෙන් පසු සමහර විට රැකියාවද අවසන් විය හැකිය. මුදිත, ඔබට හැකිනම් කරුණාකර මේ පිළිබඳ දැනුවත් කරන්න…

එසේම ඒ ආයතනවල සේවයට සරිලන වැටුපක් ඔවුනට ලැබිය යුතුය. විශ්ව විද්‍යාල ආචාර්යවරුන්ගේ වැටුප රුපියල් ලක්‍ෂ 2 ක් දක්වා වැඩිකරන කතාවක් පැතිර ගියද, එය කතාවටම පමණක් සීමා වී ඇත. මෙසේ දැනුමට සරිලන වැටුපක් ලැබේ නම් නැවත මව්රටට පැමිණීමට බොහෝ දෙනෙකු සූදානම් වනු ඇත. ආචාර්ය උපාධියක් යනු වසර 4 ක් 5ක් 6ක් හෝ සමහරවිට 7 ක් මවුරටින් බැහැරව, දෙමාපියන් ඥාතීන්ගෙන් ඈත්ව කටුකව දිවිගෙවා, දිවා රෑ නොබලා මහන්සි වී ලබා ගන්නා අධ්‍යාපනයේ අග්‍රඵලයයි. මෙසේ ලබාගන්නා අධ්‍යාපනයට ඉහළ වටිනාකමක් තිබිය යුතුය. එය හෑල්ලුවට පත් කිරීම එසේ මහන්සි වී උපාධිය ලබන්නාට කරන අගෞරවයකි. සමහරුන්ට නිකම්ම සිට ලැබෙන ආචාර්ය පට්ටමට වඩා මෙසේ කටු කා ලබා ගන්නා (earned doctorate) ආචාර්ය පට්ටම දෙදාහෙන් සම්පතකි.  මේ නිසාම සිය දැනුම නිකම්ම බෙදාහැරුමට බොහෝ දෙනා අකමැතිය. එය සාධාරණය. මෙය ආචාර්ය උපාධි ලබාගත්තවුන් ට පමණක් සිදුවන දෙයක් නොවේ, විවිධ වෘත්තීයමය උපාධි හෝ සුදුසුකම් සපුරා ඇති වෘත්තීයමය විද්වතුන්ටද අත් වී ඇති ඉරණමයි.

තෙවැන්න වන්නේ ලංකාවේ සියළුම දෑ දේශපාලනකරණය වීමයි. බොහෝ රටවල සේවය කරන්නවුන්ට මෙම දේශපාලනීකරණය පිළිබඳ අත්දැකීම් නැත. ඔවුන් උගත්කමට සරිලන ලෙස රැකියාව ලබා ගන්නවා විනා දේශපාලුවන් පසුපස ගොස් රැකියා ලබාගත්තවුන් නොවේ. එසේම ඔවුන් රැකියාව කරන්නේ තමන්ගේ උගත්කමට සරිලන තැනක එසේම උගත් වූ පුද්ගලයින් රැසක් සමඟය. මේ නිසා ඔවුන් පහසුවෙන් සිය කාරයය මනාව කරගෙන යති. නමුත් ලංකාවේ තත්ත්‍වය වෙනස් ය. සනීපාරක්‍ෂක කම්කරුවාගේ සිට ඉහළම තනතුර දක්වා සියළුම තනතුරු දැඩිව දේශපාලනීකරණය වී ඇත. කිසිදු වැඩක් දේශපාලනයෙන් තොරව කරගත හෝ කිරීමට නොහැක. මේ නිසාම දේශපාලනයට අකමැති බොහෝ දෙනා එවැනි අනවශ්‍ය හිසරදයන්ගෙන් ගැලවී සිටීමට තමන්ගේ පාඩුවේ විදේශයන්හි නිස්කාංසුවේ තමන්ගේ වැඩකටයුතු කරගෙන යති.

හොඳම උදාහරණය වන්නේ මගේ මිතුරකුගේ මිතුරෙක් ඕස්ට්‍රේලියාවේ වසර 20 ක් පමණ පදිංචිව සිට ලංකාවට සේවය කරන්නෙමැයි සිතා සියළු සැප සම්පත් අතහැර ලංකාවේ එක්තරා රජයේ ආයතනයක අධ්‍යක්‍ෂක කෙනෙකු වශයෙන් සේවයට පැමිණ ඇත. මේ මහතා පැමිණු මුල් දිනවලම සිදු වූ විවිධ අක්‍රමිකතාවයන් නිසා ඒවාට අදාල පුද්ගලයින් මාරුකර යැවීම වැනි කරුණු සිදු කර එම ආයතනය තරමක් නඟා සිටුවීමට පියවර ගෙන ඇත. මාස කිහිපයකට පසු එසේ මාරුකර යැවූ පුද්ගලයින් සිය දේශපාලන හයිය උපයෝගී කරගෙන නැවත එම ආයතනයේ එම තනතුරු වලටම පත් වී ඇති අතර ඔවුන්ගෙන් යොමු වූ තර්ජන හේතුවෙන් ම මේ මහතාට රැකියාව එපා වී නැවතත් ඕස්ට්‍රේලියාවටම ගොස් ඇත… මෙය මගේ මිතුරකුගේ මිතුරකුට සිදු වූ නිසාත් ඔහු මෙවන් කරුණක් උදෙසා බොරුවක් නොකියන නිසාත්, ලංකාවේ අනන්තවත් මෙවැනි සිද්ධි සිදුවන නිසාත්, මේ සිද්ධිය සත්‍ය වන්නට ඇති බව මම විශ්වාස කරමි. මෙවන් තත්ත්‍වයක් ඇති වන විට වැඩක් කිරීමට ආසාවෙන් සත්‍ය වශයෙන්ම මවුබිමට ආදරයෙන් පැමිණෙන කෙනෙක් පවා සුළු කළෙකින්ම කළකිරීමට පත්වනු නො වැලැක්විය හැකිය…

එසේම කිසිදු මොළයක් නැති මැරවර කමින් වංචාවෙන් දේශපාලනය කර පාර්ලිමේන්තුවට පත් වූ දේශපාලුවන්ට සුර සැප ලැබෙත්දී වසර ගණනාවක් මහන්සි වී උපාධි ලබාගත් විද්වතුන්ට කුඩම්මාගේ සැලකිළි ලැබෙන විට, ඔවුන් කළකිරීමකට පත්වීමද වලකා ලිය නොහැක. මා කතා කළ බොහෝ දෙනා පැවසුවේ යුද්ධය අවසාන වුවද, රටේ පවතින අවිචාර තත්ත්‍වය, මැරකම දූෂණය රජකිරීම යන කාරණා මත ඔවුන්ට විදේශයන්දි ජීවත් වීම සතට සැනසීමක් බවයි.. මේ නිසාම රජය ඔවුනට ආරාධනා කිරීමේදී ඔවුන්ගෙන් සේවය ගැනීමට අවශ්‍ය පසුබිම තනා ඇත්දැයි සොයා බැලීම ඉතා වැදගත් වේ. යටිතල පහසුකම් කිසිවක් නැතිව යම් තැනක සේවයට පැමිණි පසු, කිසියම් නියමිත ආකාරයකට සේවයට පුරුදු වූ කෙනෙකුට යම් යම් අක්‍රමිකතා දැකීමේදී සිදු වන්නේ එක්කෝ නිහඩව කළකිරීමෙන් බලා සටීම හෝ එයට විරුද්ධව කටයුතු කිරීමයි. දේශපාලනය කිරීම ලංකාවේ රැකියාවක් ගැනීමට හොඳම සුදුසුකම වෙත්දී සුදුස්සෝ කළකිරීමෙන් බලා සිටීමම, බුද්ධි ගලනයට මඟ පාදයි.

මෑතකදී මගේ ඥාතියකු පැවසූයේ ඔහු සේවය කරන සේවා ස්ථානයට අළුතෙන් ක්ලාක් තනතුරු සඳහා තරුණියන් බඳවාගෙන ඇති බවයි. එවුන් ගෙන් වැඩ ගැනීම ඉතා අපහසු අතර, ඒ තරුණියන්ගෙන් බොහෝ දෙනෙකුට අවශ්‍ය කරන අවම සුදුසුකම්වත් නොමැති බවත්, ඔවුන් සියල්ල මන්ත්‍රී ලිස්ට් එකෙන් හෝ දේශපාලන හෙංචයියන් ගේ මාර්ගයෙන් පැමිණි අය බව ඔහු මා සමඟ පැවසීය… මෙයින් සිදු වන්නේ එම ආයතනයේ ඵලදායීතාවය අඩු වන අතරම සුදුස්සා රැකියාවක් නැතිව මහමඟ පිකටින් කිරීමේ තත්ත්‍වයට පත් කිරීමයි.

මෙතුවක් කල් රැකියා විරහිත උපාධිධාරීන්ගේ උද්ඝෝෂණ වලට විරුද්ධව කතාකළ මම දැන් මගේ ස්ථාවරය තරමක් වෙනස් මානයකට ගෙන යාමට පවා සිතාගත්තේ මෙවන් කරුණු කාරණා, ඉතා විශ්වාසවන්ත අයගෙන්ම දැනගන්නට ලැබුන නිසාය… මේ නිසාම උගත් කිසිවෙකු, නැවත මව්රටට ඒදැයි සිතීම උගහටය…

ඉතින් බලධාරීනි… ඔබ බලනවා නම් මේ ලිපි…. සිතන්න… දේශපාලනීකරණය නොවූ, පුද්ගලයන් මත නොරැඳෙන පද්ධති සහ ක්‍රම විධි මත රැඳෙන ක්‍රියා පටිපාටීන් ඇති රටවල සේවය කරන විද්වතුන් විහින් මඩ ගොහොරුවක වැටීමට නැවත ලංකාවට ඒද ? ප්‍රථමයෙන් ඒ විද්වතුනට නිදහසේ රැකියාව කරගෙන යාමට ඉඩ අවකාශ සලසා දිය හැකි නම්, බොහෝ දෙනා නැවත මව් රටට සේවයට එනු නොඅනුමානය..

ප්‍රාදේශීය සභා, නගර සභා, පලාත් සභා, සහ පාර්ලිමේන්තුව ලෙස විවිධ පලාත් පාලන ආයතන තිබුණද, ඒවායේ පාලනය ඇත්ත වශයෙන්ම රටකට අවශ්‍ය ද යන්න සොයා බැලිය යුතුය… මෙතෙක් පැමිණි ගමන වෙනස් කර, ඵලදායීතාවය කේන්‍ද්‍ර කරගත් සංවර්ධනයක් කරා යා යුතුය.. එසේ යාමේදී විදේශයන්හි විද්වතුන්ගේ දැනුම මහඟු සම්පතකි… ඔවුන්ට නිසි සැලකිල්ලක් දක්වා නිසි ලෙස සුදුසු තැන් ලබා දී, දේශපාලන අතපෙවීම් වලින් තොරව සිය කාර්යයන් කරගෙන යාමට අවකාශ සලසා දුනහොත්, පිටරටට ගලා ගොස් ඇති අපේ බුද්ධිය රටේ සංවර්ධනය සඳහා යොදාගත හැක… යක්කු පිනුම් ගහන තැන්වලලට පය ගැසීමට දෙවියන් අකමැතිවා සේම දේශපාලනීකරණය වූ අකාර්යක්‍ෂම සේවා ස්ථානවලට පැමිණීමය බුද්ධිමතුන් සූදානම් නැත. එසේ ඔවුන් ගෙන්වාගැනීමට නම් ඔවුනට සරිලන පරිසරය යන්තම් හෝ සකස් කර දිය යුතුය. යමෙකුගේ උපරිම කාර්යක්‍ෂමතාවය උදාකරගත හැක්කේ බාහිර කරදර වලින් නිදහස්ව ඒ ඒ කරන කාර්යය සඳහා සිත යෙදවීමෙන් පමණි.

නැතිනම්, අපි හැමදාම වලේය… ආසියාවේ ආශ්චර්යය වෙනුවට ශ්‍රී ලංකාව පත් වන්නේ ආසියාවේ අයිස් ගුහාව බවටයි…

කෙසේ වුවත් මෙය සිරි ලංකාවට පමණක් බලපාන ප්‍රශ්නයක් නොවේ. බොහෝ සංවර්ධනය වෙමින් පවතින රටවල ද දැකිය හැකි බරපතල ප්‍රශ්නයකි. සංවර්ධනය වූ රටවල පවා ප්‍රාදේශීය වශයෙන් බුද්ධි ගලනය දැකිය හැක. වඩා දියුණු, හොඳ රැකියා ඇති, යටිතල පහසුකම් ඇති ප්‍රදේශ කරා ඇති හැකි අය ඒකරාශී  වීම රටක වෘත්තීයමය සමතුලිතතාවය සහ ආර්ථික සමතුලිතතාවයට බලපෑම් ඇති කරයි…

මමත් 50 ක් ගැහුවා ඕං

මගේ ලිපි බලපු, කියවපු, විවේචනය කොරපු, බැනපු, සහ කොමෙන්ටු දාපු සියළු දෙනා වෙතටයි,

2010 අප්‍රේල් 13 වැනි අවුරුදු දා සිට පසුගිය මාස කිහිපය තුළ මගේ ලිපි 49 කියවා, ඒ පිළිබඳ පැහැදී හෝ අපැහැදී කොමෙන්ටු දැමූ සහ නොදැමූ ඔබ සියළු දෙනාට මාගේ ප්‍රණාමය පිරිනමමි. ඒ කාළය තුළ 8300 කට අධික ප්‍රමාණයක පිරිසක් ඇල්කෙමියාගේ රසායනාගාරයට ගොඩ වැදී ඇත.

මම මගේ ශක්ති ප්‍රමාණයට ඔබව දැනුවත් කිරීමට උත්සාහ කරමි. දන්න සිංහල ටික හරියට ටයිප් කරගෙන සහ අන්තර් ජාලයේ සැරිසරා ඔබ වෙත මේ කරුණු ගෙන එන්නට මම ඇල්කෙමිච්චිගෙන් ද බැණුම් අහගෙන නිතර වෙහෙස වෙමි. ඈ නිතර කියනා පරිදි, “ගෙදරට කිසිවක් නොකර ලෝකය හදන්නට යන” පුද්ගලයන් ගොන්නට සමහර විට මම ද එක් වෙමි.

මගේ රාජකාරි ජීවිතය සහ පවුල් ජීවිතය සමබර කරගෙන මේ කාරිය කිරීමේදී නිතර නිතර ලිපි පළකිරීමට අපහසු වීම ම හාෆ් සෙන්චරිය පසු කිරීමට මෙපමණ කළක් ගත වීමට හේතුවයි. එසේ වුවත් මා වැඩිපුර අවධානය යොමු කරන්නේ ලිපියේ ගුණාත්මක බව සහ එයට ඇතුළත් කරන කරුණුවල නිරවද්‍යතාවය නිසා මම මගේ ගමන මේ ආකාරයෙන් හෙමින් යාම පිළිබඳ මට ගැටළුවක් නොමැත.

මෑතක දී මා “ඇල්කෙමියාගේ දිනපොත” ද ලියන්නට පටන් ගත් අතර එය ද ළඟදීම ඔබගේ සින්ඩිකේටරයට ලැබීමට කටයුතු කරමින් සිටිමි.

ඉඳහිට දේශපාලනය සම්බන්ධයෙන් ලිපි පළකළද, මගේ අවධානය යොමුව ඇත්තේ ඔබව වචනයකින් හෝ දැනුවත් කිරීම පිළිබඳවයි. මේ වසරේ මාගේ ලිපි බොහොමයක් අධ්‍යාපනික වශයෙන් සහ ප්‍රජා සෞඛ්‍යමය වටිනාකමක් ඇති ලිපි බවට පත් කිරීමට මම උත්සාහ කරමි. තනිකරම රසායන විද්‍යාව සම්බන්ධ ලිපි පළකල හැකි වුවද, සාමාන්‍ය පාඨකයාගේ රසායන විද්‍යා දැනුම හා මගේ ලිපි අතර පරස්පර තිබිය හැකි බැවින් ඔබට තේරෙන අයුරින් ලිපි ලිවීමට මා සැමවිටම උත්සාහ දරමි.

මෙතෙක් කල් මා සමඟ සිට මට ධෛර්යය දුන් ඔබ සැමට ප්‍රණාමය…

මෙයට,

ඇල්කෙමියා.

සුපර් ස්ටාර්, ඩ්‍රීම් ස්ටාර්, ඩාන්සින් ස්ටාර්, මෙගා ස්ටාර්, රියැලිටි ස්ටාර්, සහ පෝන් ස්ටාර්

සිරි ලංකාවේ ඉස්ටාර් වර්ග බොහොමයකි. සිරසෙන් ඇරඹුන සුපර් ස්ටාර් උන්මාදය රටේ පවතින හැම නාලිකාවක්ම හරහා හඹා ගොස් දැන් රටේ ඉස්ටාර්ලා වැහි වැහැලාය. ඒ කෙතරම් ද කියතොත් අපේ රටේ දැන් රෑටත් දවල් වගේය… හරිම එළියය…. මෑතදී මේ ඉස්ටාර් ලා අතරින් ලොකුම ඉස්ටාර් හොයන්න ගිහින් හරිම ජංජාලයක් උනාය කියා ආරංචිය. හරිම මරු ය…. දේශපාලුවන් සිංදු කියති. බයිලා කාරයන් රට පාලනය කරති…. අනේ අපේ රටට ගිය කළ….. !

මේ හතු පිපෙන්නා වාගේ බිහි වූ ඉස්ටාර් ලා දැන් කොහේ දැයි හොයාගන්නවත් නැත… ඉඳලා හිටලා  එහෙන් මෙහෙන් කෙඳිරි ගානවා ඇසුනත් එයින එහාට වැඩි සද්දයක් ඇහෙන්නේ නැත… අපේ කන්වල දෝසයක් ද මන්දා…. අළුතෙන්ම මේ ඉස්ටාර් ගොන්නට එකතු වෙන්න යන ඉස්ටාර් ලා දෙවර්ගයක් ගැන මේ ළඟදී පුවත්පත් වල තිබුනා. එක වර්ගයක් නම් දැන් යුද්දෙන් පස්සේ කරන්න දෙයක් නැති රණවිරු ස්ටාර්ලාගේ සේවය අගයනු වස් ඔවුන්ගේ දක්‍ෂතා පෙරට ගෙන ඒමට කරන සත් ක්‍රියාවක් වන අතර අනෙක් ඉස්ටාර් වර්ගය අපේ කට්ටියගේ වලත්තකම් නිසා සිය රූපය සහ ආත්මය දැන හෝ නොදැන පාවාදුන් Porn Star වේ. මේ දෙවර්ගය අහසට පොළව මෙනි…

ලංකාවේ බොහොමයක් රණවිරු ස්ටාර් ලා ගමෙන් ආ කොල්ලන් ය.  ගාමන්ට් වල රස්සාවට යනවාට වඩා ආමි එකට යාම සුදුසු යැයි සිතීමත්, ඉන් ලැබෙන සමාජයීය තත්ත්‍වයත් විරුකියාවත් නිසා බොහෝ තරුණයන් ත්‍රිවිධ හමුදාවට බැඳීම සාමාන්‍ය දෙයක් විය. මහින්දගේ පුතු යෝෂිත හැරෙන්නට නමට වත් ත්‍රිවිධ හමුදාවට බැඳුන එක් හෝ දේශපාලු පුතෙකු සොයා ගැනීමට අසීරුය. යම් පමණකට හෝ උගත් තරුණයෝ ඉහළ නිළධාරී මට්ටම් වලට ත්‍රිවිධ හමුදාවට බැඳුනද, මේ එක් අයෙකු වත් ත්‍රස්තවාදීන් මරා මියෙම් යැයි සිතා බැඳුනෝ නොවෙති. එසේ වුවද, මූලික පුහුණුවෙන් සහ යුධ බිමේ අත්දැකීම් වලින් පසු ඔවුන්ගේ ලයෙහි අන් කිසිවකුට නොදෙවෙනි දේශානුරාගයක් ඇති වීම දැඩි ලෙස පැසසිය යුතු සහ අගය කළ යුතු ක්‍රියාවලියකි. ඒ නිසාම ඔවුහු අපගේ වීරයන් වේ. මේ වීරයන්ට ජාතිය ප්‍රණාමය පුද කරන අයුරු ද විවිධාකාර වේ. එසේ වුවද, දැන් දැන් ඔවුනට යම් යම් සේවාවන් හිදී ප්‍රමුඛස්ථානය ලැබීම, සහ ආබාධිත රණවිර්වනට යම් තරමකට හෝ ලැබෙන සැලකීම් පැසසිය යුතු කරුණු වේ. මේ නිසාම රණවිරු රියැලිටි ස්ටාර් වැඩසටහන පැසසිය යුතු කටයුත්තක් බව නොකිවමනාය. එසේම මේ තරඟයේ විනිශ්චයන් සළකා බැලීම අන් රියැලිටි ස්ටාර් වලා වඩා වෙනස් වීම ද පැසසිය යුතුය.

මේ ඉස්ටාර් ලා අතර දැන් අළුතෙන්ම අසන්නට ලැබෙන ඉස්ටාර්ලා වන්නේ Porn Star ලාය. මේ අයගේ කතාව ඉහත කී සියළුම ඉස්ටාර්ලාට වඩා වෙනස් වේ. බොහොමයක් දෙනා සිය ඉඳුරන් පිනවා ගන්නට ගොස් වැරදි පාරට වැටුන ඉස්ටාර්ලා වෙති. තවත් සමහරු සිය පෙම්වතා හෝ අනියම් පෙම්වතා හෝ අන් අයෙකුගේ රැවටීමට හසුව නොදැනීම  Porn Star  ලා වුන උදවිය වෙත්. මොවුන් දෙගොල්ලෝම ශ්‍රී ලාංකික සමාජයේ අසරණ වූ මිනිස් කොට්ඨාසයක් නියෝජනය කරන පැතිකඩකි. එසේ වුවද, ඔවුන් මේ තත්ත්‍වයට වැටීම පිළිබඳව ඔවුන් ද විශාල වගකීමක් දැරිය යුතුය.

වැඩිහිටියන් වන අප කරන කියන සෑම දෙයකම වගකීම අප සතුය, එසේ වුවද, ලංකාවේ සිදු නොවන්නේ ද මෙයයි. කිසිවකු- කිසිවක් පිළිබඳ වගකීමක් නොදරයි. රෝහලේ හෙදියකගේ හෝ වෛද්‍යවරයෙකුගේ අතපසු වීමකින් රෝගියෙකු මළොත්, ඒ පිළිබඳ සරළ පරීක්‍ෂණයක් කෙරේ ( හෝ නොකෙරේ) මියගිය රෝගියා හෝ පවුලේ අයට ඉතිරි වන්නේ වේදනිව පමණි. කිසිවකු වගකීමක් නොදරයි. පෞද්ගලික බස් වලට යටවී මියයන මගියාට  හෝ පවුලේ උදවියට කිසිදු සාධාරණයක් සිදු වේද ? එහි වගකීම දරන්නේ කවුරුන්ද ? මේ ලංකාවේ අය වගකීම් දරන අයුරුයි. එසේ වුවද, මේ සෑම දෙනාම තම තමන්ගේ යුතුකම් අරභයා නොපසුබටව පාරට බැස අරගල කිරීමට නිරන්තරව සූදානම් ය.

දැන් මේ අපේ සදාචාරාත්මක සංස්කෘතික පොලීසිය හදන්නේ මේ Porn Star ලාගේ ජායාරූප ප්‍රසිද්ධ කිරීමටයි. එසේ ප්‍රසිද්ධ කර ඔවුන් නීතියේ රැහැනට හසුකරගැනීමට උත්සාහයක් දරනවා විය හැකිය. මේ පිළිවෙත මුලින්ම සිතට ආ අයින්ස්ටයින්ගේ බුද්ධිය හා සමාන බුද්ධියක් ඇති ප්‍රාඥයාට ජාතියේ ප්‍රණාමය හිමිවිය යුතුය. දැන් කළ යුතු එකම දේ මෙයයි. රට යුද්ධයෙන් නිදහස් ය, මත් කුඩු වලට එරෙහිව කරන යුද්ධයත් ළඟදීම නිම වනු ඇත. පාන් පිටි ත්‍රස්තවාදයත් ළඟදීම අවසන් වනු ඇත. රට සහළෙන් ස්වයංපෝෂිත වී ජනයා සුඛිත මුදිත වනු ඇත. ජනතාව සිල්වත් ගුණවත් ජාතියක් කිරීම අරභයා  මෙසේ අවලං වැඩවලට සම්බන්ධ වූ සියළුම දෙනාගේ ඡායාරූප ප්‍රසිද්ධියේ පළ කර ඔවුන් වහා සිරගත කළ යුතුය. රටේ වංචාව දූෂණය සහ නාස්තිය නැති නිසා ඒ පිළබඳ කතා කළ යුතු නැත. මේ Porn Star ලා 100 දෙනා සිරගත කළ පසු රට ලෝකයේම හොඳම සිල්වත් රාජ්‍යය වනු ඇත. ඊට පසු මෙහි පැමිණෙන සංචාරකයන්ට සූදු කෙළින්නට වෙනම කලාපයක් ඇති කළ යුතුය…. සුද්දන්ගේ මුදල් සියල්ල සූරාගෙන ඒ මඟින් රට සරුසාර කළ හැක….. ඒ සූදු කෙළින සුද්දන්ට කාමයේ වරදවා (හෝ හරිහැටි) හැසිරීම තහනම් කළ යුතුය.. එසේ හැසිරෙන එවුන්ගේ අරක කපා ඉවත් කළ යුතුය…..

මේ ඡායාරූප ප්‍රසිද්ධ කරන්නට සිතුන අයින්ස්ටයින්ට නොපෙනෙන පැත්ත මෙයයි. මේ තරුණයා හෝ තරුණිය, කාගේ හෝ දරුවෙකි, සහෝදරයෙකි, සහෝදරියකි, සමහර විට මවකි, පියෙකි. ඉරිදා දිවයින පත්‍රෙය් සඳහන් වන අන්දමට ඔවුන් බොහෝ දෙනෙකු ගමේ කෙල්ලන්ය…. සමහර විට ඔවුන් රුපියල් 50,000 ක් ලබාගෙන පාන් සහ පොල් සම්බෝල වැනි සුඛොපභෝගී කෑම වේලක රස බැලීමට අදහස් කළා විය යුතුය. ඔවුන් දැන හෝ නොදැන කළ දේ වැරදිය. එසේ වුවද එක් වරක් හෝ කිහිප වරක් විනාශ වූ ඔවුන්ගේ ආත්මයම මෙසේ නැවත් වරක් ප්‍රසිද්ධියේ විනාශ කිරීම සමහර විට මේ අයගෙන් කිහිප දෙනෙකුගේ  ජීවිත හෝ ඔවුනට සම්බන්ධ අයගේ ජීවිත කිහිපයක අවසානය විය හැක.  සිරි ලංකාව කුඩා රටකි. මෙහි වෙසෙන සියළුම දෙනා කවරකුගේ හෝ සමීප හිතවතෙකි. මේ ඡායාරූප ප්‍රසිද්ධ කළ පසු ඔවුන් කාගේ කවුරුන්ද යන්න ප්‍රචලිත වීමට වැඩි වේලාවක් ගත නොවනු ඇත. මේ Porn Star  ලාට ලැජ්ජාව බය නොමැති වුවද, ඔවුන්ගේ ඥාති හිතමිත්‍රාදීනට ලැජ්ජා-බය ඇත. මෙයින් විනාශ වන්නේ සමාජයයි. ඔවුන් අත් අඩංගුවට ගැනීම වෙනම දෙයකි. නීතියක් ඇත්නම් නීති මඟින් කටයුතු කළ හැක…

එසේත් නැත්නම් පෞද්ගලික රූපවාහිනී නාලිකාවකින් නවතම රියැලිටි වැඩසටහනක් ඇරඹිය හැක….. සිරස පෝන් ස්ටාර්, දෙරණ පෝන් ස්ටාර්, ස්වර්ණවාහිනී මෙගා පෝන් ස්ටාර්…. ආදී වශයෙන් විශාල මාධ්‍ය ප්‍රචාරයක් දී මෙය කළ හැක…… ඒ සඳහා ඉදිරිපත් වන්නට ද බොහෝ දෙනා එනු ඇත… ඔවුනට අවශ්‍ය තම ආත්මයම පාවා දී හෝ මොකක් හෝ ඉස්ටාර් කෙනෙකු වීමටය…… සිරි ලංකාවේ “සම-හරක්“ අය හිතන්නේ එහෙමය…..

 

න්‍යෂ්ඨික බලාගාරයක පැවැත්ම කෙරෙහි ශ්‍රී ලාංකික ආකල්ප බලපාන අයුරු.

මේ මහින්දගේ න්‍යෂ්ඨික සිහිනය ලිපි පෙළේ අවසාන ලිපියයි. පළමු ලිපිය මෙතැනින් බැලිය හැකියි. කුමක් හෝ හේතුවක් නිසා දෙවන ලිපිය බැලිය නොහැකි තත්ත්‍වයක් ඇතිවී ඇතත්, එය ඇල්කෙමියාගේ රසායනාගාරයේ මුල පිටුවෙන් කියවිය හැකියි.  මෙයට අමතරව ආචාර්ය මුදිතත් න්‍යෂ්ඨික බලය අපට සුදුසු ද ? යනුවෙන් ඉතා අගනා ලිපියක් මේ ගැන පළ කරලා තිබුනා.

අද මේ අවසාන කොටසින් මම සාකච්ඡා කරන්න බලාපොරොත්තු වන්නේ න්‍යෂ්ඨික බලාගාරයක් පවත්වාගෙන යාම සඳහා ශ්‍රී ලාංකිකයගේ ආකල්ප බලපාන්නේ කෙසේ ද කියලා. අපට කෙතරම් දැනුම, මුදල්, සම්පත් යනාදිය මොනවා  තිබුනත්,  යහපත් ආකල්ප සහ ගතිගුණ නැතිනම්, මේ සියල්ල විනාශ වන්නට ගත වන්නේ ඉතා සුළු කාළයක්. න්‍යෂ්ඨික බලාගාරයක් යනු සාමාන්‍ය විදුලි බලාගාරයක් නොවේ. එයට දැඩි කැපවීමක් ඇති ඉහළ දැනුමක් ඇති සහ න්‍යෂ්ඨික බලාගාරයක් පවත්වාගෙන යාම කෙරෙහි විශේෂ ප්‍රගුන්‍යයක් ඇති සේවක පිරිසක් අවශ්‍ය වෙනවා. දැනට ලංකාවේ ආයතන වල සේවකයන්ගේ ගති ප්‍රභාවය (Attitude)  දෙස බැලූ විට කිසිවකුගෙන් මෙම කැපවීම දැකිය නොහැකියි. අවම වශයෙන් උතුම් වෘත්තීන් ලෙස සැලකෙන වෛද්‍ය වෘත්තිය සහ ගුරු වෘත්තියත් දැඩි ගුණාත්මක සෝදාපාළුවකට ලක් වෙලා. පොඩි සිදුවීමකට පවා වෘත්තීය සමිති ක්‍රියාමාර්ග සහ වර්ජන කරා යන ගතියකට මේ උතුම් වෘත්තීන් පවා පත් වෙලා. මෙවන් තත්ත්‍වයක් න්‍යෂ්ඨික බලාගාරයක ඇති වීමට බැහැ. එසේ වුවහොත් එය අවසන් විය හැක්කේ දකුණු ආසියාවටම බලපාන ඛෙදවාචකයකින්.

ඒ වගේමයි රාජ්‍ය සහ පෞද්ගලික දෙඅංශයම වෙලාගෙන ඇති වෘත්තීය සමිති මාෆියාව. මේ නිසා ඇති විය හැකි සුළු කඩාකප්පල්කාරී ක්‍රියාවකින් මුළු ශ්‍රී ලංකාවේම අනාගතය තීරණය කරන්න න්‍යෂ්ඨික බලාගාරයකට හැකියි. අපේ බොහොමයක් වෘත්තීය සමිති නිතරම කල්පනා කරන්නේ තම අයිතිවාසිකම් දිනා ගැනීම පමණයි. තමන් කළ යුතු වූ යුතුකම් සිය සාමාජිකයන්ගෙන් එම සේවා ස්ථානවලට, රටට සිදු වනවාද කියා කිසිම වෘත්තීය සමිතියකින් එළිදැක්වෙනවා මා ජීවිතයේ කිසිම අවස්ථාවක දැක නැහැ. හොඳම උදාහරණය තමයි පෞද්ගලික බස් මාෆියාව. ඔවුන් තම ගාස්තු ඉහළ නැංවීමට සෑම විටම කටයුතු කළත්, බස් මගියාට හොඳ සේවයක්, ආරක්‍ෂාකාරී ගමනක් ලබාදෙන බවට කවදාවත් සහතික වන්නේ නැහැ. එයට අමතරව බේබදු රියදුරන් අශීලාචාර කොන්දොස්තරවරුන් පවා ආරක්‍ෂා කිරීමට ඔවුන් යුහුසුළුව කටයුතු කරනවා. වෛද්‍යවරුනුත් හෙදියනුත් (සමහර බෝදිසත්ව වෛද්‍යවරුනුත් හෙදියනුත් අප අතරේ නැතුවා නොවෙයි) කටයුතු කරන්නේ මාෆියාවක් ආකාරයටම තමයි. ඔවුන්ට යම් මදිපුංචිකමක් වූ විට පාරට බහින්න සූදානම් වුවත්, ඔවුන්ගේම එකෙකුගෙන් අතපසුවීමක් හෝ නොසැලකිළිමත් කම නිසා අමාරුවේ වැටුන රෝගියෙකුට හෝ මියගිය රෝගියෙකුගේ ඥාතීන්ට ඔවුන්ගෙන් ඒ සාධාරණය ඉටු වන්නේ නැහැ.

ඒ එක පැත්තක්. අනෙක් පැත්ත තමයි රාජ්‍ය අංශයේ අකාර්යක්‍ෂමතාවය. අපි මේ ගැන හැමදාම කතාකළත් එය එකතැන පල්වෙන, ගඳ ගහන නරා වලක් බවට පත් වෙලා. රාජ්‍ය අංශයේ ඉහලම සේවකයා වන ලලිත් වීරතුංග මහතාගේ සිහිනය වන යහපාලනය එතුමා අනුගමනය කළත්, අන් අයට ඒ ගතිගුණය කාවද්දන්න එතුමා පවා අසමත් වී තිබෙනවා. (මා ඒ මහතාට එසේ ආමන්ත්‍රණය කළේ වචනයේ පරිසමාප්ත අර්ථයෙන්ම ලලිත් වීරතුංග මහතා මහත්මයෙක් බව මා පෞද්ගලිකව දන්නා නිසායි) මෙයට ප්‍රධාන වශයෙන් බලපාන්නේ දේශපාලනඥයොන්ගේ හෙංචයියෝ හැමතැනටම රිංගාගෙන සහ රිංගවාගෙන සිටීම. මේ හෙංචය්යෝ වැඩි දෙනෙක් ඒ ඒ තනතුරු වලට සරිලන අධ්‍යාපන සුදුසුකම් සපුරාලූ අය නොවෙයි. මෑතකදී සිදු වූ අධ්‍යාපන අමාත්‍යාංශයේ ප්‍රශ්න පත්‍ර අවුල ආදී බරපතල ප්‍රශ්න වලට මූලික වගකීම මේ දේශපාලන හෙංචයියෝ මත වැටෙනවා. ඒ වගේම විදුලිබල මණ්ඩලය, ගමනාගමන මණ්ඩලය, රාජ්‍ය ඛණිජතෙල් නීතිගත සංස්ථාව වගේ රාජ්‍ය ආයතන වල ඇති සේවක අතිරික්තයත් මේ දේශපාලන හෙංචයියෝ නිසාම සිදු වන්නක්. මේ බත් බැලයොන්ට පඩි ගෙවන්න වෙලා තියෙන්නේ සාමාන්‍ය ලාංකීය ජනතාවගේ බදු මුදල් වලින් වීම ඊටත් වඩා මහා පාපයක්. ඉතින් න්‍යෂ්ඨික බලාගාරයක් පටන් ගත්තත් අපේ දේශපාලනඥයෝ කරන්නේ මේ ටිකම තමයි. කිසිම සුදුසුකමක් නැති තමන්ට කඹුරන බත් බැලයෝ ටිකක් එතනට ඇතුලත් කරාවි… ඊට පස්සේ ඉතිං ඉතිරි ටික ඒ අයම බලාගනීවි…..

ඒ වගේමයි අපේ රටේ තවමත් හරිහැටි ක්‍රියාත්මක නොවන වෘත්තීය සෞඛ්‍යය සහ ආරක්‍ෂණ කටයුතු (Occupational Health and Safety) පිළිබඳ කිසිවකුගේ අවධානයක් නොමැති කම. පෞද්ගලික අංශයේ කර්මාන්තශාලා වල මේ ආරක්‍ෂාව සම්බන්ධ දැඩි නීති රීති තිබුනත්, රාජ්‍ය අංශය මේ අතින් ඉතාම දුර්වලයි. උදාහරණයක් වන්නේ රජයේ රසපරීක්‍ෂක දෙපාර්තමේන්තුවේ මීට වසර කිහිපයකට පෙර වූ ඛෙදවාචකයක්. එහි සේවය කළ අනුෂා නම් ගැබිණි මවක් අත්බෝම්බයක් විශලේෂණය කිරීමේ දී පුපුරාගොස් ඇයත් ඇය කුස තුළ වැඩෙමින් තිබූ මෙලොව එළිය දකින්නට ආසන්නව තුබූ කළලයත් එතැනම මිය යාම වැනි අවාසනාවන්ත සිද්ධීන්. එසේම රජයේ විකිරණශීලී තාක්‍ෂණවේදීන් (X-ray technicians) කිහිප දෙනෙකු පසුගිය කාළයේ පිළිකා රෝගයට ගොදුරු වීමත් මේ කාළකන්නි තත්ත්‍වයේම තවත් කොටසක්. සෞඛ්‍ය අමාත්‍යාංශය මගින් විකිරණශීලීත්‍වය වලක්වන ඇඳුම් ලබා දුන්නත්, ඔවුන් ඒවා ඇඳීම ප්‍රතික්‍ෂේප කර ඇති බව සෞඛ්‍ය අමාත්‍යාංශය පවසනවා. මේ කවුරු කෙසේ කීවත්, සේවක ආරක්‍ෂණය යන්න ශ්‍රී ලංකාවේ දී සේව්‍ය-සේවක දෙපාර්ශවය විසින්ම දැඩි ලෙස අවතකසේරුවට ලක් කර ඇති අංශයක්. මෙවන් වාතාවරණයක් මත න්‍යෂ්ඨික බලාගාරයකට මෙවන් ආකල්ප ඇති පුද්ගලයන් පත් වුවහොත් ඇති විය හැකි හානිය කෙතෙක් දැයි ඔබටම වැටහෙනවා ඇති.

ඊලඟ දේ තමයි කොළඹ නගරයේ සහ ප්‍රධාන නගරවල කසළ ප්‍රශ්නයට තවමත් හරිහැටි විසඳුමක් සොයාගෙන නැතිව න්‍යෂ්ඨික අපද්‍රව්‍ය බැහැර කිරීම කරන්නේ කෙසේද යන ප්‍රශ්නය. නමුත් මේ සඳහා න්‍යෂ්ඨික ඉන්ධන සපයනවා යැයි කියූ රුසියාවෙන්ම විසඳුමක් ලබා දී තිබෙනවා. එනම්, ඔවුන් ඒ අපද්‍රව්‍ය නැවත භාරගන්නවා යැයි කියන කාරණය. මේ කරුණ අපි දෙගොල්ලොන්ටම වාසි සහගතයි. ඇමරිකාව වැනි සංවර්ධිත රටවල් පවා තවමත් න්‍යෂ්ඨික අපද්‍රව්‍ය ප්‍රශ්නයට හරිහැටි විසඳුමක් සොයාගෙන නැති අතර අපට ඒ ගැන සිතිමට වත් බැරිවුවත් රුසියාව ස්වේච්ඡාවෙන්ම ඒ කටයුත්ත භාරගැනීම අපට ඉතා ලාභදායී වීම සහ න්‍යෂ්ඨික අපද්‍රව්‍ය ප්‍රතිචක්‍රීකරණයෙන් නැවත න්‍යෂ්ඨික ඉන්ධන විශාල ප්‍රමාණයක් නැවත රුසියාවට නිපදවාගත හැකි වීම. මේ නිසා දීර්ඝකාලීන අපද්‍රව්‍ය ප්‍රශ්නය අපට ප්‍රශ්නයක් නැති වුවත් ප්‍රතිකාරකයෙන් ඉවත් කරන අපද්‍රව්‍ය අවම වශයෙන් වසර 5 ක් වත් දැඩි ආරක්‍ෂාව මධ්‍යයේ  සිසිලනය වීමට ඉඩ හැරීම නම් අපගේ වගකීමක්. යුද්ධය නිම වූවත් මෙවන් දෑ කෙරෙහි බොහෝ දෙනා ඇස ගසා සිටින බැවින් ආරක්‍ෂා කර ගැනීම ඉතා සුදුසුයි. ඒ වගේම අපේ රටේ අනාගතයේ තනන ප්‍රතිකාරකයක ඉන්ධන වර්ගය තෝරියම් ලෙස සළකා බලා තිබීම නිසා මේ අවදානම ටිකක් අඩු වී තිබෙනවා.

වඩාත්ම වැදගත්ම ප්‍රශ්නය වන්නේ මෙම යෝජිත බලාගාරය පිහිටුවන ස්ථානය කොතැනදැයි යන්නයි. බොහෝ සංවර්ධිත රටවල න්‍යෂ්ඨික ප්‍රතිකාරක ජනශුන්‍ය මෙන්ම නාගරික ප්‍රදේශ වලට ආසන්නව පිහිටවා ඇති වුවත්, ශ්‍රී ලංකාව වැනි කුඩා රටකට එවැනි අවදානමක් ගත හැකිද යන ප්‍රශ්නය නිරන්තරයෙන් පැන නඟිනවා. හදිසියේ වත් පිපිරුමක් සිදු වුවහොත් ලංකාවේම ජනගහනය සුළු කාළයක් ඇතුලත ඉවත් කළ යුතු වෙනවා මෙන්ම අසල් රටවලට ද සුළඟ මඟින් එම අහිතකර දෑ පැතිරීමේ අවදානමද අප දැරිය යුතු වෙනවා. එසේ වුවත්, නව තාක්‍ෂණය සහ නවීන ක්‍රම එකතු කරගෙන ආරක්‍ෂාකාරී න්‍යෂ්ඨික බලාගාරයක් ඉදිකිරීමේ හැකියාව කොයි කවුරුත් සතුව තිබෙනවා.

මෙම න්‍යෂ්ඨික බලාගාරයක් ඉදිකිරීමේ මූල්‍ය වියදම ඩොලර් බිලියන 6 ත් 10 ත් අතර ගණනක්. අනාගත ශ්‍රී ලංකාව සංවර්ධන ඉලක්ක කරා වේගයෙන් ගොස් විදේශ ණය පුමාණය අඩු කරගෙන ජනතාවට බරක් නොදෙන අයුරින් ආධාර ලෙස හෝ ත්‍යාගයක් ලෙස මෙම න්‍යෂ්ඨික බලාගාරය ඉදිකරගත හැකි නම්, එය ඉතා අගනා කටයුත්තක්. එසේ නැතිව සම්පූර්ණයෙන්ම අපේ වියදමෙන් මෙම කටයුත්ත කෙරෙනවා නම්, මීට වඩා අඩු අවදානමක් ඇති විදුලිබල ජනන ක්‍රමයකට අප යනවා නම් හොඳ යැයි යන්න මගේ හැඟීමයි.

ඉතින් මේ පිළිබඳ පක්‍ෂ භේදයෙන් තොරව කල්පනා කිරීමත් ඉතා වැදගත්. එක් රජයක් ගත් ණය තවත් රජයක් ගෙවා නොදමන බවට වහසි බස් දෙඩීම වැනි මුග්ධ ක්‍රියා වලින් වැලකී රටක් වශයෙන් ඉදිරියට යා හැකි ලෙස දැන් අප සිතිය යුතු කාළය එළැඹිලා. න්‍යෂ්ඨික බලාගාරයක් ඉදිකිරීම යනු දේශපාලන හෙංචයියෝ දමා නොගෙන, සුදුස්සාට සුදුසු තැන ලබා දී, නිවැරදි ශක්‍යතා අධ්‍යයන, අනතුරු පිළිබඳ නිවැරදි තක්සේරුවක් (Risk assessment)  ආදිය සිදු කර දීර්ඝ කාලීන සැළසුමක් ඇතිව කළ යුතු ඉතාමත් බැරෑරුම් කටයුත්තක්. එය හරිහැටි කර අපට ලාභදායී අන්දමට අදාල ගිවිසුම් මඟින් ඒ ඒ රටවලින් ආධාර ලබාගෙන රටට බරක් නොවී එය අපට ලැබෙනවා නම් ඉතා අගෙයි….

එය එසේ වේවායි අප සැවොම පතමු….. එසේ නොවුවහොත් පිටරටක ජීවත් විය හැකි ලෙස පුරවැසිභාවය දැන්ම ලබාගෙන තිබීම කාටත් සිතා බැලිය යුතු කටයුත්තක් වේවි….

මේ ලිපි පෙළ කියවා අදහස් දැක්වූ සැමදෙනාටම තුති……

මෙයට.

ඇල්කෙමියා….

මහින්දගේ න්‍යෂ්ඨික සිහිනය සහ ශ්‍රී ලංකාවේ අනාගතය

මහින්දගේ න්‍යෂ්ඨික සිහිනය ලිපියේ දෙවන අදියර වන්නේ මේ යෝජිත න්‍යෂ්ඨික බලාගාරය ශ්‍රී ලංකාවට උචිතද නැද්ද යන්න සහ සාමාන්‍ය ජන ජීවිතයට එය බලපාන්නේ කෙසේද කියලයි. සමහර පාඨකයො මෙම ලිපිය තරමක් පටලවාගෙන තිබුණා.

මෙම ලිපිය මුලින් පින්තූර සහිතව පළ කළත්, කුමක් හෝ හේතුවක් මත එය “සොයාගත නොහැක“ කියා පණිවුඩයක් දෙන නිසා පින්තූර රහිතව මෙසේ පළ කරනවා.

ශ්‍රි ලංකාව සහ විකල්ප බලශක්තිය

ශ්‍රී ලංකාව සතුව විශාල සමුද්‍ර කලාපයක්  ඇති අතර රට පිහිටා ඇත්තේ සමකයට අංශක 6 ක් උතුරෙනි. මෙම පිහිටීම නිසා බොහෝ අවස්ථාවල සුළං හැමීම සිදු වන අතර, වැසිබර දිනවල හැර සූර්යාලෝකය අවම වශයෙන් පැය 10 ක් වත් පතිතවන වාසනාවන්ත රටකි. සූර්යාලෝකය නිරන්තරව පතිත නොවන බොහෝ රටවල් සූර්ය කෝෂ වලින් විදුලි ජනනය සිදු කළද, තවමත් එහි ඇති අධික මූලික වියදම නිසා සහ සූර්ය කෝෂවල කාර්යක්‍ෂමතාවය අඩු නිසා තරමක් පසුබෑමකට ලක්ව තිබෙනවා. එසේම තනි තනි නිවාස මඟින් සිය විදුලි බල අවශ්‍යතා සූර්ය කෝෂ මඟින් සපුරාගෙන දිවාකාළයේ වැඩිපුර නිපදවෙන විදුලිය ජාතික පද්ධතියට එක් කෙරෙන ශුද්ධ මාපක විදුලි සැපයුම් පද්ධතියක් (Net Metering System) ශ්‍රී ලංකාවේ ඇති කිරීමට සැලසුම් කර ඇති බව මෑතකදී විදුලිබල ඇමති ප්‍රකාෂ කර තිබුනා.

නමුත් මෙහි ඇති ප්‍රධානතම ප්‍රශ්නය වන්නේ මූලික වියදමයි. තනි තනි නිවාසවල අයිතිකරුවනට ඒ සඳහා වත්කමක් නැති අතර ණය ලබාගෙන සූර්යකෝෂ සවිකරගන්න තරම් පරිසරය පිළිබඳ කැක්කුමක් අපේ රටේ ජනතාවට නැහැ. එසේම එම ආයෝජනයේ ලාභ ලැබෙන්නට අවම වශයෙන් වසර 15-20 ක් ගතවන නිසා එය එතරම් ඇඟට වදින්නේ නැති යෝජනාවක් වෙනවා.

නමුත් විශාල සමාගම් සහ ආයෝජකයනට මෙයින් හොඳ ආයෝජනයක් කළ හැකියි. මෙහිදී මූල්‍ය වියදම හැරුන විට නඩත්තුව සඳහා වැය වන්නේ අවම මුදලක්. එසේම අමුද්‍රව්‍ය නොමිලයේම ලැබෙනවා. දැන් දැන් චීනය වැනි ආසියාතික රටවල් සූර්ය කෝෂ නිෂ්පාදනයට වැඩිපුර නැඹුරු වී ඇති නිසාත් එම නිෂ්පාදනවල මිල ගණන් යුරෝපීය සහ ඇමරිකානු නිෂ්පාදනවලට වඩා අඩු නිසාත් එමඟින් හොඳ ආයෝජනයක් කිරීමට කෙනෙකුට හැකි වුවත් මා දන්නා තරමට එවන් කටයුත්තක් තවම ලංකාවේ සිදු වන්නේ නැහැ. (වෙනවා නම් දන්නා කෙනෙක් අපව දැනුවත් කරන්න). සූර්ය ශක්තියෙන් අවශ්‍ය ප්‍රමාණයට විදුලි බලය සැපයෙන්නේ නැතැයි කිසිවෙකුට තර්ක කිරීමට බැහැ.හොඳම උදාහරණය තමයි පෙන්සිල්වේනියා ප්‍රාන්තයේ පොකනෝ (Pocono) හි පිහිටවා ඇති NASCAR රේස් ධාවන පථය. එහි 100% විදුලිය ජනනය කෙරෙන්නේ සූර්ය කෝෂ පද්ධතියකින් වන අතර ධාවන පථයේ වැඩ කටයුතු සිදු නොවන අවස්ථාවල ජනනය කරන විදුලිය ජාතික පද්ධතියට විකුණා එම ආයතනය මුදල් උපයාගන්නවා.

පෙර කී පරිදි ලංකාවේ ප්‍රධාන වශයෙන් සෑම තැනකම පාහේ මුහුදු සුළං හැමීම සිදු වෙනවා. මෙය සැලකිය යුතු වේගයකින් සිදු වන අතර සුලං බලයෙන් ක්‍රියාත්මක වන ටර්බයින මඟින් පහසුවෙන් විදුලිය නිපදවා ගැනීමට හැකියි. මේ ක්‍රමයද තරමක් අධික මූලික වියදම් යන්නක් වුවත් ලාංකීය තාක්‍ෂණය මුසු කිරීමෙන් මෙය මිල අඩු ව්‍යාපෘතියක් බවට පත් කරගත හැකියි. කළකට පෙර මාතර ප්‍රදේශයේ පුද්ගලයෙක් ග්‍රාමීය ජල විදුලි බලාගාර තැනීමට ටර්බයින නිෂ්පාදනය කළ බව ඔබට මතක ඇති. එසේම නිකරුනේ නාස්ති වන තරුණ ජීවිත වලට යම් ප්‍රමාණයක රැකියා අවස්ථා කිහිපයක් හෝ බිහි කර ගැනීමට මෙවන් ව්‍යාපෘතියක් ඉවහල් වේවි. මා අසා ඇති පරිදි එක්තරා සමාගමක් පුත්තලම ප්‍රදේශයේ සුලං බල ව්‍යාපෘතියක් ආරම්භ කිරීමට සැලසුම් කර තිබෙනවා. මෙය ඉතා හොඳ ප්‍රවණතාවක්. මෙවන් කටයුතු වලට බදු සහන, ව්‍යාපෘති ආරම්භක ණය ආධාර වැනි සහන ලබා දීමෙන් දේශීය ආයෝජකයා පවා දිරිමත් කර ඔවුන් සංවර්ධන ක්‍රියාදාමයට හවුල් කරගත හැකියි.  එසේම රට මධ්‍යයේ ද සමහර ස්ථානවල දැඩි සුළං තත්ත්‍වයන් නිතර පවතිනවා එවන් ස්ථාන සිතියම් ගතකර, නිවැරදි ශක්‍යතා අධ්‍යයනයකින් පසු සුළං ටර්බයින කලාපයක් ඇති කළහොත් නිකරුනේ රට තුළින් ඇදී යන සුලං වලින් ප්‍රයෝජනයක් ගත හැකියි.

විදුලිබල ඇමතිතුමාගේ ප්‍රධාන තර්කයක් වන්නේ මේ ක්‍රම දෙකම ඒකාකාර නොවන බවයි. එනම් සෑම අවස්ථාවකදීම ඒකාකාර විදුලි සැපයුමක් මේ ක්‍රම දෙක මඟින් සිදු නොවන බවයි. එම කාරණය සත්‍ය නමුත් මේ කරුණ කාර්යක්‍ෂම විදුලි පද්ධතියක් ඇති කිරීමෙන් මඟහරවාගත හැකියි. සූර්ය කෝෂ පද්ධතියකින් සහ සුළං ටර්බයින පද්ධතියකින් උපරිම කාර්ක්‍ෂමතාවයෙන් විදුලි සැපයුම ඇති අවස්ථාවලදී ගල් අඟුරු සහ ඩීසල් විදුලි බලාගාරවල නිෂ්පාදනය පාලනය කරගත හැකි ආකාරයේ පද්ධතියක් සැලසුම් කිරීමෙන් නිකරුනේ නිපදවෙන මිල අධික විදුලි ජනනය වලක්වාගත හැකියි.

දැනට යෝජිත සහ ඉදිවෙමින් පවතින තාප බලාගාර මෙම ප්‍රශ්නයට පැහැදිළි විසඳුමක් නොවන හේතු රාශයක් තිබෙනවා. ගල් අඟුරු මිල අඩු ඉන්ධනයක් වුවත් ලංකාවේ විදුලිබල සැපයුමට වසරකට අවම වශයෙන් ගල් අඟුරු මෙට්‍රික් ටොන් මිලියනයක් අවශ්‍ය බව ගණන් බලා තිබෙනවා. මේ ගල් අඟුරු නිපදවන්නේ අපේ රටේ නොවෙයි. ආධාර වශයෙන් ලැබුණත්, අපි ඒ සඳහා යම් මුදලක්, ප්‍රවාහන වියදම් ආදිය දැරිය යුතු වෙනවා. අනාගතයේදී වැඩිවන මිලගණන් වලට (ඛණිජ තෙල් වලට වුනා වගේම) ගල් අඟුරු වල වියදමත් ඉහල යනවා. ඒ අමුද්‍රව්‍ය සැපයුම පිළිබඳ ප්‍රශ්නය. තවත් ප්‍රශ්නයක් වන්නේ ගල් අඟුරු දහනයෙන් පිටවන අධික කාබන් ඩයොක්සයිඩ් ප්‍රමාණයයි. ලංකාව හරිත රටක් වීමට සහ කාබන් විමෝචනය අවම කිරීමට කටයුතු යොදන මේ අවස්ථාවේ ගල් අඟුරු බලාගාරයකින් වන්නේ වසරක් තුළ ඒ තත්ත්‍වය අපට අහිමි වීමයි. එසේම බොහෝ දෙනා නොදන්නවාට ගල් අඟුරු බලාගාරයකින් ඉවත ලන අපදුව්‍ය විකිරණශීලී බවින් තරමක ඉහළ අගයක් ගන්නවා. දැනට ලංකාවේ ඉහළ යන පිළිකා රෝගීන්ගේ සංඛ්‍යාවට තවත් එකතුවක් මෙමඟින් ඇති වෙන බව හොඳටම පැහැදිලි කරුණක්. මේ නිසා ගල් අඟුැු බලාගාරයක් වුවත් පාලනය කළ යුත්තේ ඉතා පරිස්සමින්.

වෙනත් බලශක්ති ජනන ක්‍රම ලෙස දැනට හඳුනාගෙන ඇති උදම් බලය (සයුරේ රළ බලයෙන් ) ඇසුරෙන් ක්‍රියාකරන ටර්බයින ආදිය ඇතත්, ඒවයේ අකාර්යක්‍ෂම බව නිසා වැඩි අවධානයක් නැහැ. නමුත් මෑතකදී ලැබුන ආරංචියකට අනුව කොළඹ නගරයේ එකතු වන කුණු දහනයෙන් බලශක්තිය ජනනය කිරීමේ වැඩසටහනක් ක්‍රියාත්මක කිරීමට නියමිතයි. මෙය එක ගලකින් කුරුල්ලෝ දෙදෙනෙකු මරාගැනීමක්, කොළඹ නගරයේ අපද්‍රව්‍ය ප්‍රශ්නයට යම් පිළියමක් සේම එය බලශක්ති අර්බුධයටත් යම් පිළියමක් වෙනවා. මෙය රට පුරාම ඇති කුණු භාවිතයෙන් කිරීම දක්වා පුළුල් කළ හැකි නම් එය ඉතා අගනා කටයුත්තක් වෙනවා.

අනාගත තත්ත්‍වය.

විදුලිබල ඇමති තුමාගේ ගණනය කිරීම් අනුව ශ්‍රී ලංකාවේ අනාගත බලශක්ති අවශ්‍යතාවය 8% කින් පමණ ඉහළ යන බව මෑතදී ප්‍රකාෂ වී තිබුණා. යුද්ධය නිම වීමෙන් පසු ආයෝජන පුමාණය ඉහළ යාම නිසා ඇති වන නව කර්මාන්තශාලා නිසාත්, උතුරු- නැගෙනහිර ප්‍රදේශවල සිදු වන විධිමත් පදිංචි කිරීම් නිසාත් මේ අවශ්‍යතාවය ඉහළ ගොස් තිබෙනවා. මේ අවශ්‍යතාවලට සැපයුම සඳහා කඩිනම් වැඩ පිළිවෙලක් අවශ්‍යයි. දැනට විදුලිය විසන්ධි වීමක් නොමැති වුවත්, අනාගතයේ වැඩිවන ඉල්ලුමට සරිලන සැපයුමක් දැනට පවතින විදුලිබල නිෂ්පාදනයෙන් කළ නොහැකි බවයි පැවසෙන්නේ. එසේ නම්, කළ යුත්තේ කුමක්ද ?

නිර්දේශිත සැලසුම්.

අප රට වටා ඇති දසතින් සුළං හමන මහසයුරේ රටට ආසන්න බොහෝ ප්‍රදේශ තරමක් නොගැඹුරු ප්‍රදේශ වෙනවා. මේ තැන් නිසි ලෙස සුලං රටා අධ්‍යයනයකට ලක් කර සුලං ගොවිපොළ (Wind Farms)  ඇති කිරීමෙන් නොමිලයේ විදුලිබලය ජනනය කිරීමේ හැකියාවක් අප සතුව පවතිනවා. මෙම තත්ත්‍වය තවමත් හරිහැටි අධ්‍යයනය කරලා දැයි දැනගන්නට නැහැ. එසේම අප රටට දිවා රෑ දෙකේම හොඳ සුළං තත්ත්‍වයක් පවතින නිසා රාත්‍රී කාළයේ වුවද තරමක හෝ විදුලි ජනනයක් මෙමඟින් සිදු වෙනවා. ජල විදුලිබල නිෂ්පාදනයේ උපරිමයට අප ලඟා වී ඇති නමුත්, සුළං බල නිපැයුම් හැකියාවෙන් සියයට එකක් වත් අප සිදු කර නැහැ. එසේම මෙය ඉතාම පරිසර හිතකාමී පසුකාලීනව ලාභ ඉපැයිය හැකි ආයෝජනයක් වෙනවා.

ලෝකයේ සූර්ය විදුලි බල ශක්තිය ජනනය තවමත් මධ්‍යස්ථ අවධියක තිබුනත්, ශ්‍රී ලංකාව සිටින්නේ ප්‍රාථමික මට්ටමක. සූර්යකෝෂ මිල අධික වීමත්, සූර්යාලෝක පතනය සීමා සහිත වීමත් නිසා මෙම ක්‍රමය භාවිතා කිරීම  කෙරෙහි බොහෝ දෙනාගේ  පසුගාමීත්‍වයක් දක්නට ලැබෙනවා. මෙය ලංකාවේ මෙසේ වුවත්, බොහෝ රටවල සූර්ය කෝෂ භාවිතා කර විදුලිය නිපදවන්නන්ට බදු සහන වැනි දේ සැපයීමෙන් දිරිමත් කරනවා. බොහෝ රටවල මුඩුබිම් යොදාගෙන සූර්යකෝෂ ගොවිපොළවල් (Solar Farms) ඇති කිරීමෙන් මෙගාවොට් සියගණනක විදුලිබල ජනනයක් ඇති කරනවා. ශ්‍රී ලංකාව නිවර්තන කලාපීය රටක් බැවින් වසර පුරාම ඒකාකාර සූර්යාලෝකය පතිත වීමක් තිබෙනවා. මේ නිසා සූර්ය ශක්තියෙන් හොඳ ප්‍රයෝජනයක් ගත හැකි වුවත් දැනට ඒ උපරිම හැකියාවෙන් 10% ක් වත් සිදු වන්නේ නැහැ.

ගල් අඟුරු බලාගාර මඟින් පහසුවෙන් සහ ඩීසල් බලාගාර වලට වඩා අඩු මිලට විදුලිය ජනනය කළ හැකි නමුත්, අපරටේ ගල් අඟුරු කැණීමක් සිදු වන්නේ නැහැ. මේ නිසා අමුද්‍රව්‍ය ලබා ගැනීමට අන් රටවල් කරා යොමු විය යුතුව තිබෙනවා. ලෝක වෙළඳපොළේ ගල් අඟුරු මිල උච්චාවචනය වන සෑම විටම අපට ඒ මත අපේ කටයුතු වෙනස් කිරීමට සිදු වෙනවා. ඒ ආර්ථික පැත්ත. පාරිසරික පැත්තෙන් බැලූ විට, නිකුත් වන කාබන් ඩයොක්සයිඩ් පුමාණය සහ විකිරණශීලී විය හැකි අපද්‍රව්‍ය පරිසරයට එක් වීම ගල් අඟුරු බලාගාරයකින් නිතිපතා සිදු වෙනවා. මේ නිසා ඒ අවට ජන ජීවිත වලට දැඩි හානියක් වෙනවා. මෙය බලධාරීන් විසින් වසන් කරනු ලැබුවත්, අනාගතයේදී මෙහි පළවිපාක පෙනෙන්නට පටන් ගනීවි.

ලිපිය නැවත දිග වැඩි වෙනවා. න්‍යෂ්ඨික බලාගාරයක පැවැත්ම කෙරෙහි ශ්‍රී ලාංකික ආකල්ප බලපාන අයුරු මීලඟ කොටසින් සාකච්ඡා කරන්න බලාපොරොත්තු වෙනවා.

මහින්දගේ න්‍යෂ්ඨික සිහිනය……..2025 දී ශ්‍රී ලංකාවට න්‍යෂ්ඨික විදුලිබලාගාරයක්…………………..

මහින්දට විටින් විට හොඳ හොඳ  සිහින පෙනේ. සමහර සිහින රටට හිතකරය. ප්‍රභාකරන් නන්දිකඩාල් කලපුවේ පොරව පහරකින් මියයනවා දුටු සිහිනය, හම්බන්තොට වරාය, සහ නොයෙකුත්  සංවර්ධන ක්‍රියාදාමයන් එවැනි සුභ සිහින කිහිපයකි. සමහර සිහින රටට හැනිදායකය. තමන්ගේම නමින් පාඩු පිට දුවන ගුවන් සේවයක් පටන් ගැනීම එවැනි සිහිනයකි. මේ සිහින වල අවසාන ප්‍රතිඵලය කුමක් වුවත් සිහිනය සැබෑ කරගැනීම මහින්දගේ එක් හොඳ ගුණාංගයකි.

මහින්ද කාලයක පටන් සිය Role model එක හැටියට තියාගෙන ඉන්නේ යකෙකුටවත් බය නැති ඉරානයේ අහමඩිනෙජාඩ් ලොකු අයියාය. මල්ලීට තෙල් නැති වුන විට තෙල් බෙදන්නේත්, තේ විකුණගන්න බැරි වන විට තේ ගන්නේත් අහමඩිනෙජාඩ් ලොකු අයියාය. මහින්ද මල්ලී අයියාගෙන් ඉගෙනගත් හොඳ පාඩම් ද නැතුවා නොවේ. සුද්දාට නොනැවී තම කොන්ද කෙළින් තබාගෙන වැඩ කිරීමට ඉගෙන ගැනීම අයියාගෙන් ඉගෙන ගත් ඉතා හොඳ පාඩමකි. අහමඩිනෙජාඩ් අයියා හමු වූ කිහිප අවස්ථාවකම අයියාගෙන් මහින්ද මල්ලී ඇසුවේ හැමෝම කතාකරනා න්‍යෂ්ඨික ප්‍රශ්නය ගැනයි.

මෙසේ හමු වූ වෙලාවක අයියා මල්ලීට කිව්වේ, “ ආඩවනේ මයින්ද තමිබී පලාන් ඉන්නේ නැතුව න්‍යෂ්ඨික ප්‍රතිකාරකයක් දාන්නකෝ අප්පා…. දැන් ඇමෝම දානවා ඒන් මේන්…… පය වෙන්ට එපා අප්පා….. “ කියාය… මහින්ද මල්ලී මේ කතාවෙන් පස්වනක් ප්‍රීතියෙන් පිනාගියේ ලංකාවට තවත් දෙයක් නිකංම ලැබෙන නිසා පමණක් නොව සිරි ලංකා වාසීන් හැමෝමට තමන්ගේ ගානේ නොමිලේ විදුලි බලය සපයා,  විදුලිබලය නැති අසල්වාසී තමිල්නාඩුවටත් විදුලිය export කර ගානක් හොයාගෙන රටේ ඇති විදේශ ණය සියල්ලම ගෙවා දමා සිරි ලංකාව සංවර්ධිත රටවල හිනිපෙත්තටම යැවීමේ ඒකායන ප්‍රාර්ථනයද දැඩිව හිතට අරගෙනය.

එසේම සිරි ලංකාවට වැඩියෙන්ම ආධාර සපයන, ලෝකයේ අංක එකේ නිෂ්පාදකයා වන චීනය 2030 වන විට න්‍යෂ්ඨික ප්‍රතිකාරක 30 ක් සිය ජාතික විදුලි බල පද්ධතියට එක් කිරීමට සැලසුම් කිරීම නිසා අපටත් එකක් හෝ ඕනෑ යැයි මහින්ද සිතුවා විය හැකිය.

ලංකාවේ බලශක්ති අවශ්‍යතාවය.

2008 වසරේ ඇස්තමේන්තු අනුව ලංකාවේ විදුලිබල නිෂ්පාදනය කිලෝවොට් පැය බිලියන 9.9  කි. පරිභෝජනය 8.4කි (පරිවර්තනය හරි නම් එය ගිගාවොට් පැය 9900 ක් සහ 8400 කි). මෙයින් 48.3 % ක් පමණ ජල විදුලිබලාගාර වලින්ද, 51.7 % ක් පමණ ඩීසල් විදුලි බලාගාර වලින් ද සැපයෙන අතර ගිණිය නොහැකි තරම් ප්‍රමාණයක් දැනට ඉතා සුළු වශයෙන් ක්‍රියාත්මක වන සූර්ය කෝෂ වලින් සැපයේ. ලංකාවේ බලශක්ති අවශ්‍යතාවය වැඩි දිනපතා වැඩි වන බවත් එයට සරිලන සැපයීමක් සිදු විය යුතු බවත් සංවර්ධනය වන රටක් හැටියට අප සැවොම පිළිගතයුතු සහ ක්‍රියාත්මක විය යුතු කරුණකි.  කෙළවරපිටිය තාප විදුලි බලාගාරය (300MW), මොරගහකන්ද විදුලි බලාගාරය (150 MW) වැනි දැවැන්ත පද්ධතීන් ද අනාගතයේදී මෙම සැපයුමට එක් වීමට නියමිතය. විශේෂයෙන්ම ෆොසිල ඉන්ධන වල මිල සහ ගල් අඟුරුවල මිල ක්‍රමක්‍රමයෙන් වැඩි වන විට පුනර්ජනනීය බලශක්ති ප්‍රභවයන් (Renewable Energy Sources) වන ජල විදුලි බලය, සූර්ය බල ශක්තිය, සුලං බලය වැනි ක්‍රම වල අවශ්‍යතාවය දැඩිව දැනේ. ලංකාවේ ජල විදුලිබලාගාර පිහිටුවීමේ උපරිමයට දැන් ලඟා වී ඇති බවත් මොරගහකන්ද ජල විදුලි බලාගාරය ලංකාවේ අවසන් ජල විදුලි බලාගාරය බවත් දැනගන්නට ලැබී තිබේ. පුත්තලම (300MW) සහ සාම්පූර් හි (500MW) තවත් තාප විදුලි බලාගාර  ඉදිකිරීමට සැරසෙන බවත් පුවත්පත් වල පළ වී තිබුනි. මේ අතරට එක් වීමට නියමිත අළුතින්ම සැලසුම් කරන ලද විදුලි සැපයුම වන්නේ න්‍යෂ්ඨික බලාගාරයකි. ගිගා වොට් 1 (1000MW) ක් වන එය වසර 2025 දී ජාතික පද්ධතියට එක් කිරීමට නියමිත බව දැනට ලැබෙන ආරංචි මාර්ග වලින් දැනගන්නට ලැබී ඇත.

විකල්ප බලශක්ති ප්‍රභව.

ලංකාවේ ප්‍රධානතම විදුලිබල ප්‍රභවය වන ජල විදුලි බලයට අමතරව අනෙක් පිළිගත් සහ ප්‍රධානම ප්‍රභවය වන්නේ ඩීසල් විදුලිබලාගාර වලින් නිපදවන විදුලියයි. රජය පෞද්ගලික බලාගාර වලින් පාඩු පිට මිලදී ගන්නා මෙම විදුලි ඒකක අළෙවි වන්නේ පාරිභෝගිකයාටද දැරිය නොහැකි මිලකටයි . මේ නිසාම රජය වඩා මිල අඩු ගල් අඟුරු තාප බලාගාර ඉදිකිරීම කෙරෙහි අවධානය යොමු කර තිබේ. දැන් දැන් හරිත බලශක්ති  (Green Energy Sources ) ප්‍රභව වන සූර්ය ශක්තිය සහ සුලං බලය කෙරෙහි රජයේ අවධානය යොමු වී ඇතත්, ඒවායේ අකාර්යක්‍ෂම බව සහ ඒකාකාරී නොවන සැපයුම නිසා ඒවා කෙරෙහි සම්පූර්ණ බලාපොරොත්තු තබා ගත නොහැක. එසේම තවමත් මූලික වියදම අධික ශක්ති ප්‍රභව දෙකක් නිසා මේ කෙරෙහි ඇති අවධානය අඩු බවක් දක්නට ලැබේ. එසේම ඩීසල් සහ ගල් අඟුරු විදුලි බලාගාර වලින් පිටවන කාබන්ඩයොක්සයිඩ්  නිසා මේ ක්‍රම දෙකම අනාගත ලෝකයේ පැවැත්ම කෙරෙහි දැඩි තර්ජනයක් එල්ල කරන ක්‍රම දෙකක් බවට පත් වී ඇත. දැනටමත් ලෝකයේ කාබන් ඩයොක්සයිඩ් ප්‍රමාණය 390 ppm (කොටස් මිලියනයකට කාබන් ඩයොක්සයිඩ් කොටස් 390 ක්) වනවා. ෆොසිල ඉන්ධන පාවිච්චිය මේ අයුරින්ම සිදු වුව හොත් 2050 වන විට මේ අගය 550 – 750  ppm වීමට හැකි බව ගණන් බලා තිබෙනවා. මෙය ඉතා බැරෑරුම් වැඩි වීමක්. මේ නිසා බොහෝ රටවල් දැන් දැන් න්‍යෂ්ඨික බලශක්තිය කෙරෙහි අවධානය යොමු කර තිබෙනවා. යුරෝපය මේ සම්බන්ධයෙන් ඉතාම ඉදිරියෙන් සිටියත් අමෙරිකා එක්සත් ජනපදය පසු වන්නේ බොහෝ පිටුපසින්. ඒ නිසාම අමෙරිකාව වසර 2030 වන විට නව න්‍යෂ්ඨික බලාගාර 30ක් සිය පද්ධතියට එකතු කරන්න සැරසෙනවා. මෙමඟින් පාරිභෝගිකයාට අඩු මිලට විදුලිය සැපයීමටත්, හරිතාගාර වායු පිටකිරීම අවම කිරීමටත් අමෙරිකානු රජය සලසුම් කර තිබෙනවා.

ලෝකයේ න්‍යෂ්ඨික බලශක්ති පාවිච්චිය

ඉතින් අපට න්‍යෂ්ඨික බලාගාරයක් අවශ්‍යමද ? එයින් ඇති වන හිතකර / අහිතකර ප්‍රතිඵල මොනවා දැයි මට හිතෙන හැටියට ලියා මේ ලිපිය කියවන සීයක් පමණ දෙනා දැනුවත් කරන්නයි බලාපොරොත්තුව. මුලින් ම කියන්න ඕනෑ මේ ලිපිය බොහෝ දිග නීරස එකක් වන බව.. කැමති අය බලත්වා…… න්‍යෂ්ඨික බලශක්තිය ගැන සරළව ලියන එක වචන 100 කින් ලියලා ඉවර කරන්න පුළුවන් එකක් නොවෙයිනේ….

න්‍යෂ්ඨික විදුලි බලය.

න්‍යෂ්ඨික විදුලි බලය යනු විකිරණශීලී පරමාණුවල න්‍යෂ්ඨීන් පාලනය කරන ලද විඛණ්ඩනයකට (Controlled nuclear fission) භාජනය කර ලබා ගන්නා තාප ශක්තිය මගින් ජලය රත් කර ලබා ගන්නා ජලවාෂ්පය භාවිතයෙන් මෙහෙයවනු ලබන ටර්බයින මගින් ජනනය කරන විදුලි බලයයි.දැනට ලෝකයේ විදුලිබල සැපයුමෙන් 13 – 14 % සපයනු ලබන්නේත් ලෝකයේ නාවික යාත්‍රා 150 කට අධික සංඛ්‍යාවකට බලය සපයන්නේත් න්‍යෂ්ඨික බලශක්තිය මඟිනි. න්‍යෂ්ඨික බලය හරිහැටි ක්‍රමාණුකූලව  සහ ආරක්‍ෂාකාරීව පාවිච්චිකර විදුලි බලය ලබාගතහොත් දැනට ලොව ඇති ලාභම විදුලි ජනන ක්‍රමයයි.

න්‍යෂ්ඨික බලය ලබා ගැනීමේ ප්‍රධාන ක්‍රමය වන්නේ න්‍යෂ්ඨික විඛණ්ඩණයයි. මෙහිදී  ප්‍රධාන වශයෙන් භාවිතා කරන්නේ යුරේනියම් නම් විකිරණශීලී මූලද්‍රව්‍යයයි. ස්වභාවයේ පවත්නා යුරේනියම් සමස්ථානික තුනෙන් (238-U -99.28%; 235-U – 0.71 %; සහ 234-U – 0.0053%) න්‍යෂ්ඨික ප්‍රතික්‍රියා සඳහා යොදා ගන්නේ 235U න්‍යෂ්ඨියයි. එහිදී  සිදු වන්නේ විකිරණශීලී පරමාණුවක් වන යුරේනියම් 235 පරමාණුවේ න්‍යෂ්ඨියට සෙමින් චලනය වන නියුට්‍රෝණයක් උරාගැනීමට සලස්වා එය අස්ථායී කිරීමයි. එවිට එම අස්ථායී න්‍යෂ්ඨිය ස්වයං විඛණ්ඩණයකට භාජනය වී ක්‍රිප්ටෝන් සහ බේරියම් පරමාණු දෙකක් (89Kr & 144Ba) ජනනය වන අතර නියුට්‍රෝණ තුනක් සහ ගැමා කිරණ පිටකරයි . මෙම නියුට්‍රෝණ ආලෝකයේ ප්‍රවේගය මෙන් 7% ක වේගයකින් ගමන්කරයි.  මෙම නියුට්‍රෝණ මඟින් එම යුරේනියම් සාම්පලයේ ඇති අනෙක් 235U න්‍යෂ්ඨිවලට පහර දී නැවත නැවතත් ක්‍රිප්ටෝන් සහ බේරියම් පරමාණු දෙකක් සහ නියුට්‍රෝණ තුනක්  බැගින් පිටකරයි.

න්‍යෂ්ඨික විඛණ්ඩනය

මෙම ක්‍රියාවලිය අඛණ්ඩව සිදු වන විට එය න්‍යෂ්ඨික දාම ප්‍රතික්‍රියාවක් හෙවත් Nuclear Chain Reaction යනුවෙන් හඳුන්වයි. න්‍යෂ්ඨික බෝම්බයක් පිපිරීමේදී සිදු වන ක්‍රියාවලිය වන්නේ මෙයයි. එහෙත් න්‍යෂ්ඨික ප්‍රතිකාරකයක් තුළ දී මෙම ක්‍රියාවලිය දැඩිව පාලනය කර, එක් වරකට පිටවන නියුට්‍රෝණ තුනෙන් දෙකක් බෝරෝන් පරමාණුවලට උරාගැනීමට සලස්වා න්‍යෂ්ඨික දාම ප්‍රතික්‍රියාව වලකා ලනු ලබයි. මෙසේ පිටවන නියුක්ලියෝන වලට අමතරව මෙම න්‍යෂ්ඨික විඛණ්ඩනය නිසා අධික තාපයක් පිට වනු ලබයි. මෙම තාපය විශාල ජල ටැංකියක ඇති ජලය රත් කිරීමට සලස්වා එයින් ඇතිවන හුමාලය විශාල ටර්බයිනයක් කැරකීමට යොදාගනු ලැබේ. එම ටර්බයිනටයෙන් ජනනය කරන විදුලි බලය බෙදාහරීමේ මධ්‍යස්ථාන හරහා පාරිභොගිකයාට ලැබීමට සලස්වයි. ටර්බයිනය කැරකීමෙන් පසුව ඉතිරිවන හුමාලය නැවත ඝණීභවනය කර පෙර කී ජලටැංකියට යවා නැවත භාවිතයට ගන්නා අතර සිසිලනයට යොදාගන්නා ජලයෙන්ද ටර්බයින කැරකැවීමට සලස්වා තාපහානිය අවම කර, උපරිම බලශක්තියක් ජනනය කිරීම සිදු කරගනු ලබයි.

න්‍යෂ්ඨික විදුලිබලයේ වාසි සහ අවාසි

ප්‍රධානතම වාසිය වන්නේ න්‍යෂ්ඨික බලය ෆොසිල ඉන්ධන මත යැපෙන බලශක්තියක් නොවීමයි. ගල් අඟුරු සහ ඩීසල් බලාගාර තනිකරම ෆොසිල ඉන්ධන මත යැපෙන අතර විශාල කාබන් ඩයොක්සයිඩ් ප්‍රමාණයක් පරිසරයට මුදාහරී.  එසේම න්‍යෂ්ඨික බලාගාරයකින් පිටවන කාබන් ඩයොක්සයිඩ් ප්‍රමාණය ඉතාම අවම වේ. න්‍යෂ්ඨික බලශක්ති ආයතනය පවසන පරිදි ලොව පුරාම ක්‍රියාත්මක වන න්‍යෂ්ඨික විදුලිබලාගාර නිසා වසරකට මෙට්‍රික් ටොන් බිලියන 2 ක කාබන් ඩයොක්සයිඩ් ප්‍රමාණයක් පරිසරයට මුදාහැරීම වැලකෙනවා. එසේම මනාව පාලනය කරන න්‍යෂ්ඨික විදුලි බලාගාරයකින් පිටවන විකිරණ ප්‍රමාණය ගල් අඟුරු බලාගාරයකින් පිටවනවිකිරණ ප්‍රමාණයට වඩා ඉතා අඩු අගයක් ගන්නවා.  ඔව්…. ගල් අඟුරු වලිනුත් විකිරණ පිටවෙනවා…. ආණ්ඩුව කිව්වෙ නැති වුනාට…

න්‍යෂ්ඨික විදුලිබල ජනනයේ අවසාන ජවනිකාව පරිසර“හිතකාමී“ වුනාට, ඒ හා සම්බන්ධ බොහෝ දේ සළකා බැලිය යුතු වෙනවා….. යුරේනියම් හෝ තෝරියම් හෝ ප්ලුටෝනියම් න්‍යෂ්ඨික ඉන්ධන පොළවෙන් ඉවත් කිරීමේදී  සෑහෙන විකිරණ ප්‍රමාණයක් පිටවෙනවා. ඒවා ප්‍රවාහණය ඉතා පරිස්සමින්, විකිරණ පිට නොවන ආකාරයට කළ යුතුයි. ගබඩා කිරීම පිළිබඳ අමුතුවෙන් කිව යුතු නැහැ. විදුලි බලාගාරයේ පාවිච්චියට පෙර ඒ න්‍යෂ්ඨික ඉන්ධන දැඩි විකිරණශීලයි. එසේම වැරදී හෝ න්‍යෂ්ඨික බලාගාරයෙන් කාන්දුවීමක් සිදු වුවහොත් ලංකාවේ මිලියන 22 ක අවසානය උදාවෙනවා… විකිරණශීල අපද්‍රව්‍ය ක්‍රමාණුකූලව ඉවත් කළ යුතුයි. ඒවා දැඩි තත්ත්‍ව යටතේ ගබඩාකර තැබීම කළ යුතුයි.

න්‍යෂ්ඨික බලාගාරයේ කාර්යයන් සඳහා දැඩි කැපවීමකින් යුතු විනයගරුක සේවක පිරිසක් පුහුණුකළ යුතුයි. ආණ්ඩුව මාරු වන විට මාරු වන දේශපාලන හෙංචයියොත් එක්ක න්‍යෂ්ඨික බලාගාරයක් ගෙන යාමට බැහැ. මීලඟ ප්‍රශ්නය තමයි න්‍යෂ්ඨික ඉන්ධන සැපයුම. දැනට න්‍යෂ්ඨික ඉන්ධන වන විකිරණශීලී මූලද්‍රව්‍ය නිෂ්පාදනය කරන්නේ එටවල් අතලොස්සක් පමණයි. මේ අතරින් රුසියාව සහ ඉරාණය ඉදිරියෙන් සිටිනවා. දැනට ඇති ආරංචි අනුව රුසියාවෙන් ඉන්ධන ලබාගැනීමේ සූදානමක් ඇති අතර තෝරියම් කැණීම මඟින් අපටම අපේ න්‍යෂ්ඨික ඉන්ධන සපයා ගැනීමට හැකියාව පවතිනවා. මේ පිළිබඳ පසුව කතා කරමු. කෙසේ වුවත් මේ විකිරණශීලී මූලද්‍රව්‍ය මිල අධිකයි. එනමුත් විදුලිබල ජනනය අතින් බොහෝ ලාභදායකයි.

න්‍යෂ්ඨික අපද්‍රව්‍ය. (Nuclear Waste)

මේ න්‍යෂ්ඨික බලශක්තියේ හොඳ පැත්තයි. මෙසේ න්‍යෂ්ඨික බලය ජනනය කිරීමට යොදාගන්නා යුරේනියම් සාම්පලයේ (Uranium Rod) සැබෑවටම ප්‍රතික්‍රියාවේ යෙදෙන්නේ 5% ක පමණ ප්‍රමාණයකි ඉන් පසු අදාල යුරේනියම් සාම්පලයේ ඇති සියළුම දේ න්‍යෂ්ඨික අපද්‍රව්‍ය (Nuclear Waste)  ලෙස හැඳින්වේ.  එහි වැඩි වශයෙන්ම ඇත්තේ ප්ලුටෝනියම් Pu සහ කියුරියම් Cm වන අතර එසේම 3% පමණ ප්‍රමාණයක් විඛණ්ඩන ඵල (Fission Products) වන ක්‍රිප්ටෝන් බේරියම් ආදී ද්‍රව්‍ය ඇතුලත් වේ. එකසේ වුවද, මේ සියල්ලම කෙටි කාලීනව හෝ දීර්ඝ කාලීනව විකිරණ පිටකරනු ලබයි. 1GW (1000 MW) ප්‍රතිකාරකයක් සාමාන්‍යයෙන් වසරක් තුළ න්‍යෂ්ඨික අපද්‍රව්‍ය ටොන් 27ක් පමණ පරිසරයට එකතු කරනු ලබයි. එහෙත් මෙම අපද්‍රව්‍ය නැවත සකස් කළහොත් සැබෑම වශයෙන් අපද්‍රව්‍ය ලෙස ඉවත දැමිය හැක්කේ ටොන් 2 ක් වැනි සුළු ප්‍රමාණයකි. උදාහරණයක් ලෙස ගතහොත් මෙතුවක් කල් අමෙරිකා එක්සත් ජනපදයේ එක්රැස් වූ න්‍යෂ්ඨික අපද්‍රව්‍ය සියළුම ප්‍රමාණය  වන ටොන් 50,000 ක්ට අධික ප්‍රමාණය නැවත සකස් කළ විට ඉතිරි වන්නේ ඝන මීටර 1500 ක පමණ සුළු ප්‍රමාණයකි. එසේ වුවද ඇමරිකා එක්සත් ජනපදයට පවා ඇති ප්‍රශ්නයක් වන්නේ මෙම අපද්‍රව්‍ය නැවත සකස් කිරීම සහ අපද්‍රව්‍ය තැන්පත් කිරීමයි. දැනට නෙවාඩා ප්‍රාන්තයෙහි යුකා කඳුයාය, න්‍යෂ්ඨික අපද්‍රව්‍ය බැහැර කරන ස්ථානයක් ලෙස සකස් කර ඇති වුව ද, මේ ගැන බොහෝ වාද විවාද ඇති අතර එය විශාල දේශපාලන ප්‍රශ්නයක් බවටද පත්ව ඇත.

න්‍යෂ්ඨික අපද්‍රව්‍ය ඉතා විකිරණශීලී වන අතර හැසිරවීම ඉතාම පරිස්සමින් ක්‍රමාණුකූලව සිදු කළ යුතුය. සුළු හෝ අත්වැරදීමක් බොහෝ දෙනෙකුට දීර්ඝකාලීන අහිතකර පලවිපාක ලබාදිය හැකි සිදුවීමකි. සාමාන්‍යයෙන් ප්‍රතිකාරකයකින් ඉවත් කළ අවුරුදු 10,000 ක් යනතුරු න්‍යෂ්ඨික අපද්‍රව්‍යවල විකිරණ පිටවන බව ගණන් බලා ඇත. ඉවත් කර වසර 40 කදී විකිරණශීලීතාවය 99.9% ක්ම ඉවත් වුවත්, වසර දහස් ගණනක් යනතුරු ඉතිරිය පවතින බව කියැවේ. න්‍යෂ්ඨික ප්‍රතිකාරකයකින් ඉවත් කළ වහාම මේ භාවිතාකළ ඉන්ධන දඬු (fuel rods) වසර 5 ක් පමණ කාලයක් ආවරණය කළ ජල තටාකවල බහාතැබීම සිදු කරනු ලබයි. මෙසේ කල් ගතවන්නේ එම දඬු සිසිලනය වීමට සහ ඒ වනවිටත් පිටකරන විකිරණ නිරාවරණය වලක්වාලීම සඳහායි. මෙසේ කල්ගත වූ පසු, එම දඬු වියලි අපද්‍රව්‍ය තැන්පත් කරන ලෝහ සහ කොන්ක්‍රීට් වලින් තැනූ බහාලුම්වල තැන්පත් කෙරේ. බොහොමයක් න්‍යෂ්ඨික ප්‍රතිකාරක වල අපද්‍රව්‍ය ඒ ස්ථානවලම තැන්පත් කර ඇති අතර අමෙරිකා එක්සත් ජනපදය වැනි දියුණු රටක් පවා න්‍යෂ්ඨික අපද්‍රව්‍ය ඉවත් කිරීමේ බැරෑරුම් ප්‍රශ්නයට මැදිව සිටින රටක් බව නැවතත් කිව යුතු වෙනවා.

එසේ වුවත් මෙම න්‍යෂ්ඨික අපද්‍රව්‍ය ප්‍රමාණය සාම්ප්‍රදායික ගල් අඟුරු බලාගාරයකින් නිකුත් කරන අපද්‍රව්‍ය ප්‍රමාණයට වඩා බොහෝ අඩුයි. කාර්මීකරණය වූ රටවල කර්මාන්තශාලා වලින් නිකුත් කරන විෂ සහිත රසායනික අපද්‍රව්‍ය පුමාණය මීට වඩා වැඩි වුවත් න්‍යෂ්ඨික අපද්‍රව්‍ය වල තිබෙන බැරෑරුම්කම නිසාම සහ නිහඬව සිදු කරන දීර්ඝකාලීන හානිය නිසා න්‍යෂ්ඨික අපද්‍රව්‍ය අන්තරාදායක බව අතින් ඉදිරියෙන් සිටිනවා.

ලිපිය දිග වැඩි වෙනවා…. න්‍යෂ්ඨික බලය ලංකාවේ ආර්ථිකයට, සමාජයට, සහ මහජනයාට බලපාන අයුරු මීලඟ කොටසෙන් සාකච්ඡා කරන්නම්…

ඔබේ අදහස් සඟවාගෙන ඉන්න එපා… ඔබ මේ ගැන හිතන්නේ මොකද කියලාත් කියන්න….

සබ්බේ Politiciaනා Opportunistiකා

මහින්දට තුන ලැබුනේ රනිල්ගේ තුනට ඩෝං ගා කුළුගෙඩි පාරක් ද දෙමිනි.

සැමදා ඔබ ළඟ ඉන්නම් කියූ මනුෂ මල්ලී ද (ඌට මල්ලී කියන්න මට අයිතියක් ඇත… ඒ ගාල්ලේ ඉස්කෝලෙ යන කාලෙ පහල පන්තියේ හිටි ඌ මට අයියේ කියා ඇමතූ නිසාවෙනි)

මගෙයි කියා පවසන්නම් කියූ පබාවතී නංගී ද රනිල්ට කොකා පෙන්වා මහින්දගේ පැත්තට ගොස් ඇත…. මේ පිල් මාරුවක් සිදු වූ පළමු වතාව නොවේ.

සිදු වන අවසන් වතාවද නොවේ…. මේ දේශපාලනය නම් මඩ ගොහොරුවේ ස්වභාවයයි.

පිල් මාරු නොකළ දේශපාලුවෙකු සොයා ගැනීම බොහෝ අමාරු රාජකාරියකි. ඒ අතින් බලන විට මහින්ද කවදාවත් පිල් මාරු නොකළ දේශපාලුවෙකි.

චන්ද්‍රිකා හිටු කියලා ගහත්දීත් මහින්ද කට්ට කාගෙන සිරි ලංකා එකේ හිටියේය…. ඒ කට්ටේ ප්‍රතිඵල දැන් පරම්පරා 7 කට ලැබී තිබේ… දැන් ඉතින් රාජපස්ස පරපුර සිරි ලංකා ඉතිහාස පොතේ පරිච්ඡේද 25 කට විතර ඉස්සරහට ලියවෙනු ඇත… නාමල්ගේ පුතා ජනාධිපතිවරණයට ඉල්ලනවිටත් රනිල් තරඟ කරන බව ඇල්කෙමියාට විස්සාසය.

දේශපාලුවන් අවස්ථාවාදී වන්නේ ඇයි ?.

දේශපාලුවන් එකෙක්වත් දේශපාලනයට එන්නේ අපට සේවය කරන්නට නොව, උන්ට සේවය කරගන්නටය යන කාරණය අපේ ගොන් හරක් ඡන්ද දායකයන්ට සහ දේශපාලුවන්ගේ හෙංචයියන්ට වැටහෙන්නේ නැත. එසේ නැත්නම් වැටහෙන්නට මොළයක් නැත, එසේත් නැතිනම් වැටහුනත්-නොවුනා සේ සිටිති. ඡන්ද දායකයා ගොනාට අන්දාගෙන ඉන්න පුළුවන් තාක් කල් දේශපාලුවා යහතින් වැජඹේ. එපමණක් නොව ඒකාගේ හත්මුතු පරම්පරාවම ගොඩ දාගන්න වැඩ කර ගනී. රට හදන්න ආ එජාපෙත් ජවිපෙත් පොදුජන එක්සත් පෙරමුණත් එකය. ඒ කියන්නේ උනුත් මුනුත් අරුනුත් එකය… එපමණක් නොවේ ගරු කටයුතු හාමුදුරු පක්සෙත් එකය… උන්නාන්සෙලා ඔක්කොටම වැඩිය හපන්ය. උන්නානාසේලා පාර්ලිමේන්තුවේදී සත් ගුණවත් ආචාර්ය මරිසි තුමාට කියලා කිරිපල්ල මිරිකවාගත්තේ නොදන්දා මංගල්‍යයන් වදාරන්න ගිහිල්ලා බව හැමෝටම අමතකය… දනුන බෑණාගේ අම්මාට අකැප ඩොලර් රතන හිමියන්න කැප වුනේද මේ අවස්ථාවාදී බවේ එන, කන්න ඕන වුනාම කබරගොයත් තලගොයා කරන විශිෂ්ඨ දේශපාලන සම්ප්‍රදාය නිසාවෙනි….

දේශපාලුවන්ගේ අවස්ථාවාදී බව හොඳටම කියාපාන්නේ ප්‍රභාකරන්ගේ ඉරණමයි. කට්ටිය කියන අන්දමට මහින්ද බලයට ආවේ ප්‍රභාට කුට්ටියක් දීලාය කියලයි. එහෙම කරපු ප්‍රභාට පොන්සේකා ලවා ගේම දුන්න මහින්දගේ පිහිටට ආවේ රනිල්ගේ කපටි ටිකිරි මොළයයි.

රනිල් ජනාධිපතිවරණෙට ඉල්ලුවා නම් වැලේ වැල් නැතිව විපක්‍ෂ නායක කමත් ගහලා යන නිසා ජේවීපිය මාට්ටු කරගෙන සරත් ෆොන්සේකව ගොනාට අන්දලා ජනාධිපතිවරණෙට යැව්වා.

ෆොන්සේකටත් දිනන්න බැරි වෙච්චි එකේ මම කොහොම දිනන්නද කියලා ඒකට නිදහසට කරුණු කිව්ව රනිල් ඊළඟට කළේ ෆොන්සේකව පැත්තකට කරලා මහ ඡන්දෙට ඉල්ලපු එකයි. ෆොන්සේකා එක්ක සන්ධානගත වෙලා ඡන්දෙ ඉල්ලුවා නම් ෆොන්සේකට විපක්‍ෂ නියක කම දෙන්න වෙනවනේ…. මෙන්න මේකයි නියම දේශපාලන බුද්ධිය හෙවත් අවස්ථාවාදීත්වයේ උපරිමය… ඒ වගේමයි, මහින්දත්… රනිල් ජිවත් වෙලා ඉන්නකම් රනිල්ව කෙසේ හෝ යූඑන්පියේ නායකත්වයේ තියන්න මහින්ද නොගන්නා උත්සාහයක් නෑ… රනිල් විරෝධීන් පොදු පෙරමුණට ගන්න කාරියත් මේ දෙන්නා කතා වෙලා කරන දෙයක්… මෙන්න මෙහෙමයි ලංකාවේ දේශපාලනය….

පබා ආණ්ඩුවට ගියාම පබාගෙ මහත්තයාගේ කාර් සේල් එකට කාර් ලැබුනෙ කොහොමද කියලා ඔප්පු කරනවා කියපු දයසොරිට දැනුයි මතක් වෙලා තියෙන්නේ ඒ බව කියන්න… හැබැයි පබාගෙ මහත්තයාට කාර් හම්බ වෙලා ඇත්තේ පබා යූඇන්පියේ ඉන්න කාලෙ වෙන්න ඇති.. ඒ බව දයාසොරිට අමතක වෙලා….

ඉතින් මේ වගේ අළුගුත්තේරු දේශපාලුවන්ට නැවත නැවතත් පාර්ලිමේන්තුවට පත් වෙන්න ඡන්දෙ දෙන එවුන්ට තලන්න ඕන මඩු වලිගෙකින් හොඳට පාර හිටින්න… ගොටුකොළ නස්නෙයක් හදලා නහයට වක්කරන්න ඕන මොලේ පෑදෙන්න….

ලබන ඡන්දෙදි වත් මොලේ පාවිච්චි කරලා රටට වැඩක් ඇති එවුන් ටිකක් පත් කරලා යවනවලා… අපිට නං ඇති අමාරුවක් නෑ….. අපිට ඔබාමා කොරලා දෙයි…. ලංකාවෙ ඉන්න අය තමයි විඳවන්නේ…..